豉椒魚塊飯 + 豆腐火腩飯 (外賣) ( 8-APR-2021 )

豉椒魚塊飯 - 呢個餸好味呀

豆腐火腩飯 - 里奧大人話估唔到我叫呢個飯   哈哈   我本身想叫 2 個小菜   但份量真係好多   又唔想食剩留番聽晚再食   所以我話叫兩個晚餐就最好

( 8-APR-2021  THU )

今朝涼涼地   依家啲天氣真係好難預測呢 ~

早餐食芝腿治烘底   好飽但唔會滯   如果食腿蛋治就好滯   8 卦成日笑我講話好滯   但滯同飽感覺真係唔同㗎 ~

超級勁忙   做到 11 點 45 分先停一停 ~

8 卦生咗第 2 個   所以今日請食薑醋   我可以慳番一餐   因為 1 件豬腳 + 1 隻蛋 + 1 嚿薑都好飽下 ~

仍然忙啦   做長命 Report 真係好傷神   真係做到 5 點 15 分要抖下 ~

放工即走   今晚里奧大人 10 點先放工   所以我買埋外賣去佢公司一齊食   最搞笑佢同事叫我等埋里奧大人放工   我話唔會啦   點坐 4 個鐘呀   哈哈 ~

食到 7 點左右都走喇   我要去姑奶屋企拎嘢 ~

7 點 45 分左右到   依家會換對拖鞋   但真係好驚對拖鞋囉   我係咁易踩住就算   即係唔會着實   因為我好怕着佢屋企對毛毛拖鞋   因為好肯定佢無洗 ~

之後話鍾意拖到個地好濕   再開風扇吹乾   咁先乾淨   不過我唔會點解個地好濕會覺得乾淨 ~

仲話夏天拖完地   唔駛着拖鞋添㗎   我問係咪直接上床瞓 ?!   佢話係呀   個地乾淨嘛   但我話個地有塵㗎喎   開咗窗就會有塵啦   妳真係好污糟 ~

原來都傾咗半個鐘   我都要番屋企喇 ~

番到屋企就拖地   之後沖涼   咁我自己喺屋企   多數會整理一下啲文件 ~

咁收到一間保險公司嘅保單總結資料   我第一時間以為自己無交保費   因為真係完全無印象呢間公司   之後再睇番記錄   原來又改咗另一間保險公司名   真係改咗好似第 4 次喇 ~

里奧大人 10 點幾先番到屋企   仲要搞啲煩嘢   估佢今晚都應該瞓得唔好㗎喇 ~

今晚唔係好眼瞓咁   可能無睇韓劇唔駛追字幕   哈哈   不過 11 點幾都要瞓呢 ~