辣拋豬肉 + 蕃茄南瓜湯 ( 14-JUL-2021 )

( 14-JUL-2021  WED )

感恩一覺瞓天光   可以精精神神去徑步喇 ~

番到屋企   里奧大人問我熱唔熱 ?!   我話吸完冷氣去徑步   雖然流好多汗   但又唔覺熱   反而沖完個涼就覺得熱喇   可能又吹頭又要換衫   心情都比較趕咁   所以會熱   哈哈 ~

早餐食甜餐包 + 檸檬茶   咁樣份量都唔錯 ~

菇場勁忙呀   仲要煩嘢   阿爽又特別煩   叫我 Email 問工廠資料   之後佢 Email 答我用舊資料   頂咩   好心一早答我啦   叫我問完自己又答我   多止一舉   已經第二次係咁   完全唔組織一下先叫人做嘢   麻鬼煩 ~

Lunch Time 出去行陣   行咗一個大圈   見個天好似想落雨   所以即買魚片頭米番菇場喇 ~

仍然做煩嘢   每做一次真係死好多細胞   同埋個頭會好痛   其實仲未做完   但我都係放工即走   好唔想對住佢呀 ~

去完街市買蕃茄南瓜都菜都即番到屋企   今晚遲咗好多呀   所以一番屋企要即預備滾湯喇 ~

是日晚餐 - 辣拋豬肉 + 蕃茄南瓜湯

辣拋豬肉 - 之前喺泰國買嘅現成醬   真係好鬼正   有機會再去泰國   真係會大量入貨   用嚟做手信都唔錯   細細包唔阻定   哈哈 ~

蕃茄南瓜湯 - 買 6 個大蕃茄要 $27   半個南瓜要 $22   依家飲素湯都唔平   但就可以飲起碼 2-3 日   咁就抵喇   哈哈 ~

接近 9 點先去徑步   里奧大人以為我唔徑步呀   我話今晚食飯點都要做運動呢 ~

沖埋涼就休息   今晚真係比較攰   所以唔洗衫住喇 ~

今晚睇 Youtube   有個係玩問答遊戲   同里奧大人一齊玩   估唔到答案又幾好笑 ~

我 11 點唔夠都瞓覺喇   里奧大人就繼續睇其他嘢 ~