三色椒炒豚肉 + 麻醬青瓜車厘茄 ( 13-MAY-2022 )

尋晚食剩嘅炒烏冬   今晚要再食

好想食甜嘢   所以又買豆沙燒餅

( 13-MAY-2022  FRI )

又落雨   好在唔係好大雨咋   咁可以唔着水靴嘛   因為今日著長褲   再著水靴會好熱呢 ~

早餐當然食奶醬多啦   哈哈   同事依家都知我日日食多士   佢地成日覺得我唔飽   但我真係覺得多士 + 半杯咖啡已經好飽   可能番工早起   胃口無咁大呢 ~

菇場忙呀   所以時間都快過 ~

Lunch Time 出去買麵包比里奧大人   之後去買菜   最後買埋牛什河就番菇場喇 ~

溫總見我只買菜   問我夜晚係咪只係食菜 ?!   我話唔係啦   屋企有急凍肉嘛   唔駛去買咁囉 ~

仍然忙呀   做極唔完但又唔願做咁   哈哈 ~

4 點 45 分先嚟做 Urgent 嘢   仲要係肥仔豪啲煩嘢   寫得唔清楚   之後又要改   我真係黑臉呀   因為佢同阿輸真係將啲嘢搞到簡單複雜化   我答佢做一個步驟已經搞掂   不過輸又懶   死都唔肯做   仲聽到佢同肥仔豪傾咗成半個鐘   真係頂佢地唔順   完全浪費時間 ~

好在我開行 Turbo 做   可以放工前搞掂咋 ~

今晚準時走啦   里奧大人今日補假呀   所以我想快啲番屋企煮飯 ~

是日晚餐 - 三色椒炒豚肉 + 麻醬青瓜車厘茄

三色椒炒豚肉 - 今次真係估唔到里奧大人鍾意食   仲食咗好多三色椒添   我以前釀魚肉   佢唔係點食三色椒架   所以今晚我都好開心   始終樣樣蔬菜都要食啲嘛 ~

麻醬青瓜車厘茄 - 前排買咗車厘茄   都見佢開始縮水   所以都要食喇   當餐前小食都唔錯   哈哈 ~

洗完碗就開機洗衫   今晚我自己跳舞   抖多陣就開機洗衫   搞掂就即沖涼喇 ~

我同里奧大人講今日肥仔豪啲煩嘢   佢都話我個方案最快捷簡單   唔明點解阿輸同肥仔豪要搞到咁複雜   菇場嘅 System 同啲人又老化   好在我部門啲同事都好信我做法   唔係真係一樣嘢要搞好耐囉 ~   

我話 8 卦上次都係比阿輸老點   之後我話問題係因為阿輸懶   你做咩比佢呢   佢就咩都唔駛做囉 ~

睇下電視   今晚 11 點幾都自己瞓先   其實只係少少眼瞓   但聽日番工唔想太夜瞓咁囉 ~