五香肉丁蟹捧出前一丁 ( 10-AUG-2024 )

里奧大人話唔講話係蟹捧   佢係睇唔出呢碟係咩嚟   哈哈

( 10-AUG-2024  SAT )

感恩一覺瞓天光呀   我覺得自己好似無郁過咁呀 ~

今朝同里奧大人出去食早餐   不過無咩胃口添   可能睇奧運睇到個人好攰   但今晚 9 點又要繼續支持   不過四年先一次   點都要支持下嘅   時間許可嘅話 ~

星期六番工就係咁嘅樣    哈哈哈哈

諗住食亞麻籽包飽啲   但無胃口就照舊啦

食完就去里奧大人公司坐陣先番工   星期六唔會咁早番去   因為同事唔會咁早番   一陣無門口入就慘 ~

小新卡片套依家特價 $18.5   再忍下手先

菇場唔忙   咁做自己嘢啦   之後又同家姐傾下電話   所以好快又過咗半個鐘   我覺得星期六番工啲時間過得特別慢囉   因為實在好想快啲放工   哈哈 ~

家姐同我哋食午餐   我放工要即走   咁就同到家姐一班車喇 ~

都估到佢又拎哂啲 Cream 比我㗎喇   佢成日話我環保袋細個   我話 Size 係正常的   只係妳買太多嘢比我啫 ~

咁我話放上屋企先   佢一坐低梳化就即開個袋   以為佢拎啲消毒嘢噴下   但原來係拎生日利是比里奧大人   因為我話呢個月可能唔去到佢屋企呀   真係笑死啦   我話遲比甚至乎唔比都無問題啦   自己一家人 ~

里奧大人嘅生日利是   家姐話記得叫里奧大人用啲錢   我話點解要咁強調 ?!   佢話里奧大人次次比番佢呢封利是嘅銀碼再加多啲囉   之後我話其實妳一陣可以親手比佢   佢話就係驚唔記得先比定先囉   哈哈

同家姐去食店先   我話叫嘢食先啦   佢又話要等埋里奧大人先叫 ~

里奧大人差唔多 2 點先到呀   好在大家都唔係話好餓   呵呵 ~

坐我哋隔離有對夫婦   佢跟住我哋咁叫意粉同火山骨   又問我哋好唔好食 ?!   我話我都係第一次食咋   咩都試下咁啦 ~

酥炸魷魚鬚配蒜香沙律醬 ($88) - 我哋一致都話好味道

自家製鮮茄醬慢煮雞胸意粉 ($88) - 都 OK 啦

自家秘製火山骨 ($88 細份) - 我無食過正宗嘅味道   但我聞過係酸酸辣辣味道嘅

   

味道似甜甜哋嘅豉油   不過肉質都好嫩嘅   同埋有 3 大件

呢件係我嘅   咁我比最大件比家姐   所以佢食唔哂呀   我哋又飽   幫唔到佢 lu   呵呵

里奧大人問家姐點解一齊食午餐嘅 ?!   家姐話姐夫同朋友出去做運動   所以同我哋食午餐   之後里奧大人話幾時嚟食都得啦   但家姐話假期想陪姐夫食嘛   哈哈 ~

唔記得講開煮啲咩醬料   家姐話我都識煮啦   我話多謝李錦記   家姐話以為同佢講多謝妳   佢話好在聽完我講哂先   哈哈哈哈 ~

一路食一路傾   話咁快又 3 點幾   係時候走人喇 ~

里奧大人番屋企瞓覺呀   我就送家姐搭車 ~

經過樓上就買包原味夏威夷果仁   買完再去 HKTVmall 買提子   番到屋企已經成身汗   又要沖涼洗頭了 ~

澳洲原味夏威夷果仁半磅 (忽然驚喜價 $29) 

陽光玫瑰香印提子 ($49.90)

之前叫家姐工人幫我訂嘅   真係辛苦佢同家姐幫我拎呢

家姐話冬菜味公仔麵好味道喎   佢又買 Pack 比我   咁我之前叫佢幫我睇蠔油價錢   點知佢又用換購價 $23.90 換 1 樽比我   仲話我有蠔油燜餸喇   真係比佢激死啦   叫佢睇唔係叫佢買嘛   所以好驚叫佢幫我睇價錢   因為佢一定買比我   唔理平定貴囉

開埋機洗衫就睇 Youtube   里奧大人 5 點都起身喇   不過佢要番公司做喇 ~

今晚同里奧大人一齊番崇拜   崇拜完畢就番屋企先   里奧大人就要番公司做嘢 ~

抖陣就預備晚餐   里奧大人 7 點 45 分先番到屋企呀   所以今晚好似好趕咁   因為趕住睇奧運嘛 ~

4 條珍寶蟹捧   次次一落鑊煮就散哂

是日晚餐 - 五香肉丁蟹捧出前一丁

五香肉丁蟹捧出前一丁 - 之前買咗好多五香肉丁   係時候要清咁啲啦   同埋想假期先煮麵   咁就唔駛煩里奧大人個 Lunch Box 喇   哈哈 ~

洗埋碗即沖涼   今晚 9 點又同同里奧大人坐定定睇乒乓球女子團體決賽   中國對日本   我好耐無睇乒乓球賽事   估唔到日本都好勁   不過最後都係國家隊贏呢   開心開心 ~

可惜里奧大人無睇最後一局啦   因為佢飲完啤酒好眼瞓   我今晚又係 11 點 40 分瞓覺呀 ~