咖哩薯仔雞下肶 ( 18-AUG-2024 )

( 18-AUG-2024  SUN )

今朝同里奧大人一齊起身   但我就係去家姐屋企嘅 ~

家姐會問我食咩 ?!   我同佢講話仲係好飽   唔好預我食咁多   哈哈 ~

皇牌咸肉糭

醬皇蒸鳳爪

蜜汁叉燒包 - 家姐話記得我話食叉燒包   但我係食雪山叉燒包噃   之後佢就係咁話激死我   仲諗住叫叉燒包妳食添   我話下次食咪得囉

鴛鴦燒賣皇

飲飲下茶   侍應走過嚟同家姐講   話阿妹今日放假嚟聚下都好吖   喺屋企傾下偈都好舒服   不過佢依家忙過我啦   所以多數星期六日朝早見   反正我都會起身   雖然有時係比較攰   但唔想咁多藉口比自己囉   始終時間自己安排   最多一陣瞓晏覺囉 ~

飲完茶就去超市睇嘢   不過無嘢買   所以即番屋企喇 ~

Berry 又係好熱情咁撲我   仲係咁撲我 Pat Pat   一係就撲我肚腩   果然識貨   哈哈 ~

依家我真係唔會餵埋入口喇

想繼續食

引佢

之後對衰眼咁望我   哈哈

家姐上次食過話好食   所以特登去買比我㗎   咁我話下次唔駛特登去買呀下   

同家姐一齊睇嬋寶跳水   但其實我哋只係睇嬋寶同陳芋汐   所以好快睇完   哈哈 ~

睇睇下就糟糟打嚟   家姐係咁喂喂喂   原來佢倒轉手機聽電話   真係笑鬼死   因為睇片唔知咩方向嘛 ~

佢哋傾偈   我攬住 Berry 嘛    佢無啦啦放屁   唔怪得咁定啦   哈哈   家姐問點知道佢放屁 ?!   我話一大陣紅蘿蔔湯嘅味道呀   仲要向住我   我點會唔知呀大佬 ~

家姐話尋日牙醫話佢刷牙好大力   家姐話成日牙肉流血以為牙周病添呀   咁佢洗完牙   醫生話佢啲牙可以用多 30 年   咁又好呀   睇牙真係好貴呢   依家阿花又要去整牙   要用萬幾蚊呀   所以真係要好好保健啲牙   唔係真係牙痛心又痛呀   哈哈 ~

成日無啦啦會喺我身上攣嚟攣去   家姐話要我身上都有佢陣味   又話鍾意我先咁喎   是但啦   佢唔鍾意我   我都鍾意佢㗎啦

12 點走人   估唔到班車早咗早咗 6 分鐘車   搞到家姐同 Berry 都趕埋   哈哈 ~

里奧大人要開會   咁佢話買米線去佢公司食   咁就唔駛咁趕 ~

毛豆仁橄欖菜炒肉碎（山楂串串有機紫菜牛蒡茶

食完就去買餸   里奧大人就要去開會喇 ~

買完餸就去樓上買無激素雞下肶   估唔到又有試食   咁我又坐低食先   因為好熱呀   我想坐低抖下 ~

三送飯 - 毛豆仁橄欖菜炒肉碎 + 山楂串串 + 有機紫菜 + 牛蒡茶

我本身企喺度食㗎   之後見到有位坐   咁當然坐啦   我拎住兩大袋嘢好重呀   不過我食完都會快快走   因為試食唔應該坐咁耐啦

山渣串串好味呀

食完就買嘢   差唔多 3 點半先番到屋企 ~

沖埋涼就整咖哩   抖多陣就開機洗衫同熨衫   之後睇 Youtube 喇 ~

買咗龍眼肉同胎菊

姑奶打嚟問我有無發燒 ?!   因為我話食榴槤好燥熱   之後我又同佢講話食完完榴槤好似條氣好咗咁呀   佢又叫我間唔中買榴槤番嚟食   佢又咁講   哈哈   傾咗 15 分鐘就要預備晚餐喇 ~

里奧大人 7 點幾先番到屋企   今日開咗好耐會呀   辛苦佢了 ~

里奧大人話每人一條   但佢有兩條   因為佢同事識我   同埋今日都見到佢   佢仲同我講話好耐無見添呀

是日晚餐 - 咖哩薯仔雞下肶

咖哩薯仔雞下肶 - 乾咖哩真係好辣   但我覺得好正呀   哈哈 ~

洗埋碗就沖涼休息   今晚重溫男子 10 米跳水    我話 9.5 分   里奧大人以為我話佢 9 點仲唔沖涼   哈哈 ~

睇下睇下   差唔多 10 點 50 分先瞓 ~