鎮江骨 + 燒汁焗雞翼 + 芫茜皮蛋魚片湯 ( 11-AUG-2024 )

( 11-AUG-2024  SUN )

今朝 7 點起身   里奧大人以為我陪佢番公司   但我話都係去家姐屋企呀 ~

皇牌咸肉糭 - 姐夫話食糭   咁就好喇   我哋唔駛諗食咩   呵呵

陳皮牛肉腸粉 - 都好多牛肉   所以家姐成日叫我食

醬皇蒸鳳爪 - 真係錢可以唔比   但鳳爪唔可以唔食   哈哈哈哈

鮮蝦三寶餃 - 家姐好快手夾咗 1 粒   佢話因為係脆肉瓜   覺得唔好食所以食   我都好奇怪佢做咩咁快夾呢

木魚燒茄子

鴛鴦燒賣皇 - 呢個又係老是常出現   除非無咗干蒸牛肉

沙律蝦春卷 - 食剩 2 條要打包

飲完茶就同家姐行超市   開心開心 ~

我話買生果   家姐又話仲差 $3,000 先簽滿額   所以又請我食   之後又比埋個麵包優惠 E-coupon 買麵包   我話好在今日有嘢送比佢   咁當打和   哈哈 ~

日本王林蘋果 $38/4 個其實係抵嘅   同埋可以自己揀   因為一田係 Pack 好哂呢

我同家姐講話如果住妳附近   妳就會用好多錢   佢好愕然問點解 ?!   我話妳見到筍嘢實買埋比我   即係變咗咩都會買兩份   咁啲錢咪用多咗囉 ~

一開門   Berry 女繞過姐夫同家姐   再行出門口半個身位撲我   家姐都話佢係咪咁掛住我呀 ?!

再坐喺度歡迎我

換 1 個套好似要 $1,300   咁家姐話換 3 個就算   我話得啦   其實挨住背嗰啲又無爛到   因為 Berry 唔會抓到囉   最搞笑家姐都唔敢講真嘅價錢比姐夫知   話如果太貴就一定話唔會   話太平又驚佢話要換哂 6 個   哈哈   但佢又唔捨得掉咗張酸枝梳化   咁唯有換梳化套呢

講開上次驗眼   家姐話佢喺 OWNDAYS 配咗眼鏡   個職員話家姐嘅眼鏡片好似溜冰場咁   哈哈   不過我就唔係成日戴眼鏡   同埋我只係用眼鏡布抹   所以唔會咁花囉 ~

工人原來今日放假但唔出街   頭先佢哋一齊放狗   另一個工人問佢一陣去邊 ?!   佢話喺屋企   之後家姐話叫工人一陣唔準喺房開冷氣呀下   下個月收到電費單要 Share 比   工人碌大對眼望住家姐   哈哈 ~

我同家姐講話工人瞓喺度講電話講咁耐   唔辛苦唔口渴咩 ?!   家姐即話佢坐喺度傾啦   仲拎定水同零食入房添㗎 ~

想睇冰格有啲咩   估唔到有咁多三文魚   因為 HKTVmall 同樓上唔係成日做特價

家姐叫我睇佢買咗好多 Pack 鈣思寶喎   之後又話比檸檬茶比我   我話唔要呀

家姐同糟糟傾股票   之後家姐話: Check 下戶口先啦妳阿媽   我話妳好似講粗口咁嘅   哈哈   佢其實意思係叫妳阿媽 Check 戶口先   但佢好鍾意將阿媽家姐呢啲擺最尾㗎 ~

我同家姐坐喺度傾偈   我托住 Berry 個頭仔   之後問家姐唔知 Berry 瞓得好舒服 ?!   家姐話肯定舒服   如果唔係一早走狗   哈哈   又話動物唔會呃人   唔鍾意一定唔會黐住妳喎 ~

佢瞓咗 10 分鐘

大媽好搞笑   送個筆袋比家姐   連大媽個老公都話家姐用唔用筆袋㗎 ?!   大媽話八哥吖嘛   所以買囉   佢真係每次見到八哥嘅嘢就送比佢㗎   真有心

1 點鬆啲走喇   同家姐一齊帶 Berry 去街   之後送我搭車   我同 Berry 講 ByeBye   佢唔理我   之後聞完啲草   我再講 ByeBye   佢就飛過嚟陪我   真係好鬼得意   我上車仲望到實一實呢 ～

我見有人就會即拎番個袋   佢好斯文   係咁講好唔好意思咁   我話無問題呀   可能佢見前面兩個人都唔拎起個袋    之後佢見前面有兩個位   佢走上去坐   仲話唔好意思迫住我   我話唔好咁講啦   佢坐完之後   再擰轉頭叫我放低個袋喺隔離位啦 ~   

里奧大人開會到 2 點   咁又未打比我   我就即去買餸先   咁唔駛一陣再行多次 ~

買完餸就   番屋企放低完嘢   里奧大人就話開完會去食下午茶了 ~

食完就去拎錢   咁啱里奧大人公司打嚟   佢就聽完電話就話番公司   之後一出去先記得無拎到錢呀   即入番去睇啦   隔離兩部機嘅人話啲錢已經入番去櫃員機了   仲教我哋打去熱線   咁即打啦   不過要等 6 日先有通知 ~

里奧大人就番公司做嘢   我就番屋企喇 ~

今日大豐收

蕃薯餅又再出現喇   所以即買   我同家姐每人 2 個

抖陣就滾湯   里奧大人 5 點先番到屋企   原來頭先有突發嘢要處理   唔怪之得咁耐啦 ~

我差唔多 6 點就去同家姐交收   傾咗陣就番屋企 lu ~

家姐要 5 粒

番到屋企即預備晚餐   不過其實都只係焗雞翼同煮飯   所以都好快搞掂 ~

是日晚餐 - 鎮江骨 + 燒汁焗雞翼 + 芫茜皮蛋魚片湯

鎮江骨 - 因為想清埋支鎮江醋   其實份量可以煮 3 餐嘅   不過我真係唔想再見到支鎮江醋   加上里奧大人唔鍾意食呢啲醬汁嘅骨   所以一次用鬼埋佢喇 ~

燒汁焗雞翼 - 今日晏咗食下午茶   里奧大人只食咗 2 隻雞翼   其他可以留番做聽日嘅 Lunch Box ~   

芫茜皮蛋魚片湯 - 好想飲湯呀   咁就即滾呢個魚湯   落咗茶瓜係好味好多   但真係太耐無滾呢個湯   諗咗好耐好耐先醒起叫 "茶瓜"   連續兩晚夜瞓有啲攰   所以無哂記性咁 ~

洗埋碗就沖涼休息   今晚要食多啲生果   因為唔想擺到唔記得咗食   哈哈 ~

好在無整爛 

無花果好甜   MACARON 變得唔甜了   哈哈哈哈

里奧大人熨衫   搞掂就睇奧運   但其實無咩想睇 ~

咁睇到女子舉重 81+ 公斤金牌戰   睇睇下又幾好睇咁   最邪係頭先同里奧大人講   今晚唔駛睇奧運添 ~

家姐先搞笑   話佢同事比 A/C 佢   依家睇番所有跳水賽事   今朝比佢睇完嬋寶   今晚就狂煲佢啲賽事同訪問   咁似我嘅   哈哈 ~

今晚終於可以 10 點 40 分瞓覺喇   突然覺得好早添 ~