生炒排骨 + 梅菜蒸鯇魚 ( 13-sep-2011 )

( 13-sep-2011 tue )
今朝見里奧大人 9 點醒咗   我又想瞓又想醒   不過最後都醒啦   難得大家咁早起身   又去鴻星飲茶喇 ~

咸水角蝦餃燒賣馬拉糕牛肉煲仔飯

飲完之後我就去超市買餸   番到屋企見到里奧大人瞓着咗   之後我話食完又瞓好攰咩   佢話係喎   佢頭先係諗住起身睇一陣聖經再瞓過   點知見我醒咗   又知我想飲茶   所以咪飲囉   咁話喎 ~ 
不過唔好講笑   我都有小小攰   醃好嘅 d 餸   再坐喺梳化睇雜誌   之後我都瞓咗成個鐘呀 ~ 
差唔多 1 點半就 lunch 喇   喺屋企煮麵再加埋尋晚食剩嘅雲吞   成日以為得 10 粒雲吞左右   點知原來係 20 粒   不過唔理喇   照淥哂去算喇 ~


嘩   飽到咩咁   唔郁唔得啦   即刻熨幾件衫   不過熨熨下又好熱咁唔想熨   之後去沖涼   再焗牛油曲奇   唉   真係好怕焗曲奇   次次都唔掂嘅   照足哂食譜架喎   都係唔掂嘅   d 曲奇唔係燶咗呢   就係焗到好硬   真係無心機呀 ~


唔知點解無啦啦好想食甜嘢   所以就開咗個月餅黎食喇   我唔會自己買月餅架   根本無可能食得哂   今次本來已經叫家姐比個美心月餅我架   但里奧大人又拎咗個海港月餅比我   咁就唔要家姐拎啦   點知尋晚里奧大人阿 Head 又比咗個美心月餅佢喎   所以我好開心呀   因為我覺得美心好食 d 囉 ~

6 點半準時入廚房   7 點半有得食   對我黎講算勁架喇 ~ 
是日晚餐 - 生炒排骨 + 梅菜蒸鯇魚
生炒排骨 - 里奧大人鍾意食   所以我會間唔中整   佢話好味過出面食架   不過真係好唔鍾意炸嘢   彈到周圍都係   最慘係彈到隻手好痛啊 ~   
梅菜蒸鯇魚 - 覺得里奧大人好耐無食魚   雖然有魚湯飲   但我都好想佢食魚   所以就整喇 ~ 
雖然今日假期無出街   里奧大人都做公司嘢   但又唔覺悶喎   有時喺屋企 hea 下都係一種樂趣   最緊要有自己愛嘅人喺身邊就得架喇   嘩哈哈哈 ~