煎雞翼 + 節瓜大魚尾湯 + 煎釀三寶 ( 外賣 ) ( 9-sep-2011 )

( 9-sep-2011 fri )

呢日係同里奧大人結婚週年喇   晏下眼就過咗咁多年   但我都仲係每日都好掛住佢架   佢放工話去到九龍灣   我就會開住閉路電視睇住佢呢   所以佢一出 lift 我就已經開定門架喇   不過果時做女都係咁樣   唔會坐定定等人   好似家姐話坐緊 van 仔番緊屋企   我就會企喺窗台度望住佢落車架   又會喺門口望住部 lift   其實我都幾有潛質做看更   哈哈 ~

今朝搞笑   家姐打電話比我  傾傾下里奧大人又打黎   同里奧大人傾傾下個鐘點又打黎   忙到我呢   之後再打番比家姐   叫佢幫我諗食咩早餐呢 ~

雖然菇場一世都會咁靜英英   但今日 Happy Friday 加上今日結婚週年   心情真係唔錯架 ~

呢排成日翻睇 "賢內助女王"   見到 d 主角成日食泡菜   搞到我超勁想食泡菜   咁啱菇場附近有得買韓式小食   所以就買泡菜飯喇   佢地有泡菜腩肉飯買架   不過好想就咁試泡菜飯   好似好健康咁   不過我都仲未接受到泡菜嘅味道   但身在韓國食嘅泡菜又真係好好味架喎   點解會咁呢 ~

食完之後個胃有 d 唔舒服   下次都係咪搞齋食泡菜喇 ~ 

放工行下百佳   突然間好想食壽司   諗住買   點知一盒都要 $78   得果 7-8 件   覺得唔抵咁呀   仲要唔係太新鮮   更加唔會買   仲好啦   慳番 ~

今晚里奧大人 7 點幾番到屋企啦   真係無諗過咁早囉   今日佢上午番咗大陸   3 點幾就番到香港 office   唉   如果係咁就唔叫鐘點煮飯   出去慶祝啦   真係人算不如天算   不過都好感恩今晚可以同里奧大人一齊開飯呢 ~

聽晚會同里奧大人屋企做節   所以我又焗定 d 朱古力曲奇   因為朱古力 11/9 到期   而麵粉就 18/9 到期   哎 yo   唔理啦   清得幾多得幾多喇 ~