大澳一日遊 ( 24-sep-2011 )

( 24-sep-2011 sat )

呵呵   終於等到 OFF 喇   里奧大人一早諗定好去大澳   不過呢排天氣唔係咁好   所以都係聽天由命   好感恩   今日天氣都幾好   唔落大雨就得架喇 ~10 點起身   去太興食早餐   之後就梳洗出發去大澳喇 ~

坐 E22 喺東涌落車   再轉 11 號巴士   坐咗個幾鐘頭車終於到啦 ~  

( 次次經過呢度  都有小朋友玩  玩得好開心添呀  我覺得 d 小朋友好鍾意玩水咁 )

一去到就買烤魷魚   再望下個電話   原來 1 點半 lu   里奧大人見到間酒樓有蝦醬炒飯就雙眼發光   又話要食嘢架喇   話費事一陣行入去無嘢食喎 ~

嘩   一去到張枱   超多烏蠅呀   要即轉枱   叫做無咁多囉   唔係見里奧大人咁想食個炒飯   我即走喇   不過應該唔會再有下次   因為 d 嘢無厘味道 ~

大澳蝦醬炒飯 ( $55 ) - 無厘味道 酥炸生蠔 ( $88 ) - 細細隻蠔咋  我好憎食咁樣嘅炸粉  未食到隻蠔都已經漏喇   所以我食咗小小炸粉咋   同埋有水嘅   好驚囉   之前買嘅烤魷魚   放喺隻碟度   用筷子夾黎食都唔錯   唔駛整污糟隻手唉   被迫食飯   好飽啦   所以唔可以食炸蕃薯住   要臨走先食   但里奧大人又食到個油籽喎   即係蘿蔔絲酥餅   佢黎大澳目的都係想食呢個炸物 ~
( 炸芋頭 / 油籽 / 炸蕃薯 )食完就行喇   不過應該吽雨囉   超級多青蜓   好驚囉   左避又避   里奧大人仲話我有咩好驚   之後佢有一下唔知避咩   我咪話番佢囉   叫人唔駛驚   自己又咁驚 ~   終於吽出雨啦   不過係毛毛雨   之後真係無咁多青蜓   實在太好喇 ~行行下見到有班小朋友圍住曬咸蛋黃   又幾得意喎   同埋 d 蛋黃好大隻呀   我好小見到咁大隻   其實應該係唔會留意蛋黃 ~

( 曬緊鹹魚   一粒粒黑色果 d 係烏蠅   搞到我依家有 d 驚食鹹魚 )行到盡頭就坐下   超級正呀   d 風吹到我想瞓覺   真係好寫意   所以有時假期真係好想遠離市區呢   沿途又影下相咁   好 relax 呀 ~ 

( 吹住風   望住個山真係好爽   真係差 d 瞓着   我同里奧大人講如果沖完涼坐喺度   肯定好好瞓   佢話點解成日都講沖涼嘅   我話因為頭先好焗  出咗汗   所以超想沖涼 )  ( 咁大個煲唔知煲乜   勁想叫里奧大人開黎睇下 )( 再行入去就係民居   坐喺度抖涼嘅阿婆話企喺度影相就得   再行入去就唔得架喇 )
( 山上有好多大山墳   又天陰陰   所以突然覺得呢段路好陰森恐怖 )

( 彈彈魚 )
( 好多都係銀色鐵皮屋   好 cyber feel )( 得幾粒房角石就支撐到一間屋   勁呀 )( 呢個閘好似有幾首詩 )   差唔多 4 點半就走 lu   其實仲係好飽   但真係好想食炸蕃薯囉   最後又買咗炸蕃薯   油籽同豆腐花喇   今次堂食   嘩   又係好多烏蠅囉   好鬼驚呀   點解會咁架 ~

( 炸蕃薯 )( 油籽 - 餡料係蘿蔔絲 )( 凍豆腐花 )

坐咗 45 分鐘車出到東涌   行咗個 mall 一陣唔想行喇   其一好攰   其二好多人   無哂 mood 啦   搭地鐵番屋企算喇   由東涌企到九龍灣   超攰呀 ~  番到屋企第一時間灘喺梳化呀   其實今次去大澳都無去南丫島行山行咁耐   可以轉車轉車又轉車   之後又要企到番屋企   所以好鬼攰囉 ~里奧大人話好滯喎   唔想再食晚飯   我就食咗小小豬腳薑當晚飯   難得星期六可以 relax   大家沖完涼精神爽利哂   再食豬肉乾 + 啤酒 + 睇電視   簡簡單單都可以好開心呢 ~