咸菜胡椒浸肥蜆
海味上湯雜菜煲
( 15-sep-2011 thu )
星期四 lu 今日去麥記食煙肉蛋漢堡特價餐 星期一食都係 $15 今日加到 $16 不過算啦 我覺得早餐喺 $20 之內都叫做平架喇 ~
今朝咬緊包嘅時候 見到隔離再隔離嘅枱嘅男人將杯凍奶茶嘅冰 "北" 落碗通粉度 佢係 "北" 哂 d 冰架 我心諗係咪想飲冰鎮奶茶 feel 呀 無理由 "北" 哂家嘛 之後再望下去 佢喺度食通粉呀 OMG 原來佢想整凍 d 通粉 我覺得好核突呀 咁我食完出門口 見到有個道友用飲管飲溝奶茶果杯奶仔呀 呢間咁多怪人嘅 真係要諗諗仲去唔去食好呀 ~
菇場嘅 receptionist 放幾日假 所以我要幫手開門 咁又幾好喎 行下無咁悶 ~
晏晝有 lunch box 我同事問我尋日嘅生炒排骨係咪我整 話好好味呀 oh 比人讚下真係幾開心嘅 不過佢可能唔知咩叫好睇唔好食 哈哈 ~
今晚同媽咪出去食飯 食食下無啦啦見到家姐喎 我仲以為自己認錯人 原來佢特登拎 d 新鮮無花果比媽咪 同埋拎個日本金桃比我呀 話因為中秋節佢同媽咪食咗個桃 我同里奧大人無得食 所以特登買比我地食喎 成 $50/個 我覺得好貴呀 唔怪之得佢今日成日問我去邊度食嘢啦 原來如此 ~
食完去媽咪屋企坐陣喇 其一要飲腐竹糖水 其二媽咪買咗榴槤比我喎 媽咪話上次見里奧大人話好食 所以就買喇 里奧大人有福啦 我屋企人對佢咁好 嘩哈哈哈哈 ~
今晚里奧大人 9 點半就番到九龍灣 我叫佢自己出去食算喇 我真係好攰 唔想煮嘢唔想洗嘢呀 只係好想快 d 瞓覺 ~
沒有留言:
發佈留言