銀龍茶餐廳 @ 荃灣 ( 26-OCT-2013 )

潮式四寶河 ( 魚蛋 / 魚餃 / 肉丸 / 墨丸 )

銀龍魚蛋河

( 26-OCT-2013  SAT )

今朝又 8 點起身   早餐食燒賣粉果   好耐無食喇   其實呢間麻麻地好食   不過勁想食就無辦法啦   同埋呢間係差唔多 9 點先無咩人   平時超級多人   所以一定唔會好食囉 ~  

菇場超級靜   好多同事上咗廣州   有 d 又 off   唉   如果唔駛番星期六幾咁好呢 ~

放工即走   我又諗唔到去邊   所以我就番屋企先喇 ~

其實我想去北角買 cream   不過特登去買支 cream 就走   好似好浪費時間   同埋我又唔想去銅鑼灣喎   所以我話不如去荃灣   順便探埋朋友 ~

諗住坐 van 仔   不過等咗 10 分鐘唔等喇   之後轉去搭地鐵算喇 ~

去到荃灣都差唔多 3 點   咁我當然帶里奧大人去食酸辣米線啦   勁想帶佢食好耐架喇   好在佢都話好食   計計埋埋我食咗 3 餐米線   係時候停一停喇   唔係好厭 ~

我嘅豬紅豬腸酸辣米線 ( 小辣 ) - 個湯底顏色好似無咩料到咁   但其實越食越辣   勁過癮呢 

里奧大人嘅豬腩肉紫菜酸辣米線 ( 小辣 )

炸雲吞 - 新鮮炸當然好味   不過都幾厚皮　

呢間米線真係好抵食   小鍋米線 $20 咋   配料又多

食飽有力喇   行下商場   其實我唔知邊度打邊度   總之有入口就入咁啦   今次超勁開心呀  
里奧大人買咗件冷外套   我又買咗 4 件長 tee   之後再買下其他嘢   完全無諗過會買到嘢呀 ~

菜菜仔話差唔多 6 點會到金飯碗   咁我地都等埋佢啦   都差唔多成年無見嘛 ~

行呀行   行完千色店   里奧大人話攰   咁我話去大家樂啦   食小小嘢   坐下抖下 ~

塊薯餅超級難食 @@

抖完就去正隆行買夏威夷果仁同杏仁同松子   之後里奧大人話買香蕉糕   咁買埋就走喇 ~

4 款唔同味嘅香蕉糕   有 1 件係有豆沙餡 

6 點去金飯碗睇下菜菜仔到未   點知佢又未到   咁去麥當勞飲杯熱朱古力等佢啦   以前麥當勞嘅朱古力有棉花糖架   依家無 lu ~

一坐得飲咗幾啖   菜菜仔就話佢到咗   不過唔理佢啦   飲埋先走 ~

去到佢就開始埋數   咁我地又幫襯下佢啦   我最想買嘅就係潤腸同鵝肝腸同臘腸   再買 d 醬料同其他立立什什嘢   之後佢放埋 d 大閘蟹入雪柜   又要 check 又要噴水   搞咗個幾鐘   本來佢叫我地搵地方坐黎等佢   不過一場黎到就唔走啦   坐喺度睇佢做嘢   吹下水   咁 d 時間都好快過嘅 ~

鵝肝腸真係好抵   因為家姐之前喺中環名店買要 $2xx/斤呢

好後悔無買黎試呀 -.-

搞掂哂都 9 點幾喇   佢叫我地飲嘢   不過我地話要食埋嘢呀   因為番到九龍灣先食就太夜喇 ~

因為佢唔食   所以唔陪我地去沙爹王   話求其茶餐廳算喎   佢叫我地去銀龍   咁里奧大人想食炒飯   但呢間嘢 d 服務態度完全唔掂   懵盛盛嘅   問完又問   問到火都黎   之後就出黎話無炒飯   早講啦   搞咁耐得個吉   想食蒸魚又要等 30 分鐘   蒸黃立鯧咋噃   又唔係大條   駛唔駛 30 分鐘呀真係   最後叫粉麵算喇   最緊要快   因為菜菜仔要番屋企食飯嘛 ~

佢搭地鐵   我地就坐 van 仔   菜仔係都扯住里奧大人要佢搭地鐵   不過里奧大人話坐 van 仔快好多   所以都係坐 van 仔   點知   夜媽媽唔認得路呀   最後去到商場見到地鐵站標誌   叫佢打番比菜菜仔一齊搭地鐵走    搞笑 ~

番到屋企 11 點幾喇   無諗過今晚會咁夜   oh ~        

$20 咋   真係好震架   可以拎住出街   一路行一路按  呵呵   同埋最好係可以用電芯或者 USB 叉電   唔錯唔錯

粟米茶   我估甜甜地幾好味

冬天要煮蕃薯糖水   黑糖唔小得呢   

韓國醃肉醬 / 余均益辣椒醬 / 大地魚粉

發光耳挖   堅好用呀   哈