煎三文魚扒 + 蕃薯葉 ( 7-OCT-2013 )

( 7-OCT-2013  MON )

今朝里奧大人唔舒服   所以唔番工   咁我都瞓到 8 點先起身 lu ~

早餐食腿蛋治烘底   食飽 d 精神 d ~

菇場靜啦   之後 8 卦又 skype 話其實佢上星期生日   話我無良心喎   又話佢唔會特登同人講佢生日   好似迫人做 d 咩咁   真係好煩   過咗去又要提   不過我唔會補番請佢食生日飯架   佢太貪得無厭喇   成日攞人着數   我最憎囉   所以佢再講其他嘢   我都無理佢   因為我覺得佢真係好煩 ~

今日有 lunch box   一叮完呢   成個 pantry 都充滿哂蒜頭豆豉味   好香架   其實我好驚叮出黎係孜然味   因為真係好格甩底味囉   好難頂 ~

諗住 hea 過   估唔到又忙喎   8 卦無啦啦又 skype 講我生日同我去飲茶   我話唔駛   之後又話佢星期六同朋友食咗生日飯定咩   總之今日 3 次 skype 都講生日有關嘅嘢   真係好討厭   男人老狗駛唔駛咁呀   係咪死都要我請到為止先罷休呀   佢覺得我會唔好意思   會補番佢食生日飯   不過我唔會啦   當我傻咩   你睇得你自己太重要喇 ~

放工即走   等咗 20 分鐘車   好在唔駛買餸咋 ~

里奧大人感冒菌入腸   所以要食清 d   咁就絕對無問題啦 ~   

是日懶餐 - 煎三文魚扒 + 蕃薯葉 

煎三文魚扒 - 又唔記得落生粉先煎   唔怪得煎嘅時候覺得塊皮唔脆啦   本來諗住煮黑椒汁   不過里奧大人要清嘛   所以我自己點泰式甜辣醬算 lu ~  

之前喺一田買架   好抵   $108 再 95 折   同埋好厚肉架   易我覺得煎 d 呢 

蕃薯葉 - 今次喺街市買架   $10/斤   雖然超市 $15/2 pack 貴 d   但真係靚 d 咁喎   我覺得里奧大人麻麻地鍾意食蕃薯葉   所以我本來諗住用蒜蓉炒架   不過費事一陣里奧大人又話油   承機唔食   所以灼熟就算   一滴油都無落架 ~

7 點開餐   實在太開心喇   無咩幾何嘛   之後同里奧大人講番 8 卦成日提生日單嘢   佢話點解 8 卦好似死唔斷氣咁成日提   叫我唔好理佢   呢 d 人唔值得為佢勞氣 ~

約咗姑奶同事 9 點就落去樓下拎麵包機   諗住聽日拎埋去機場   不過原來都成 16 磅   根本無可能 hand carry 上機   所以最後都係擺喺我屋企   攞黎搞呢 ~

今晚成日聽到里奧大人話瞓喇瞓喇   總之佢每做完一件行唔係話今晚早 d 瞓就話我要瞓   聽到我都煩   之後我去沖涼   佢又話去瞓   我都忍唔住話   哎~~丫~~瞓啦   講咗幾十次瞓喇 ~