蔥油雞 + 蔥粒炒飯 + 油麥菜 ( 29-OCT-2013 )

齋滷味 @ 三德 ( 北角 ) - 都 ok 好味   家姐仲買咗條春卷   同佢 share 食   我鍾意食素春卷架   最怕食芋頭春卷   唔鍾意 d 口感

芒果糯米糍 @ 三德 ( 北角 ) - 好味呀   夠煙韌   豆沙又唔甜   里奧大人都話好食   下次我要買 6 個獨享 ^^

( 29-OCT-2013  TUE )

尋晚開番冷氣真係瞓得唔錯噃   今朝都幾精神咁啦 ~

今朝食腿蛋治烘底   我最驚食 d 蛋係生生地咁   人地覺得好滑   但我覺得好多菌   哈   以前細個打邊爐會點生雞蛋   話無咁熱氣嘛   又話要飲埋邊爐 d 湯   又話無咁熱氣   我真係信架   不過我無食生蛋黃好耐喇   好記得最後食果次係食沙爹牛肉麵餐   會有煎雙蛋加麵包   我食完麵之後已經勁飽   再食埋隻雙蛋   d 蛋黃喺我口腔入面滾動   之後我想嘔   自此之後無再食蛋黃 lu ~

菇場有小小嘢做咁啦   之後又係休休閒閒咁過喇 ~

今日有 lunch box   食完就去買糖比家姐   佢話呀   坐車有時會打機同睇報紙   之後勁想嘔   梗係啦   架車咁 chok   我都試過坐 van 仔打機   之後勁頭痛到想嘔   所以之後唔敢坐車打機 lu ~

放工即走啦   要去攞鞋   番到屋企就即煲中藥同開機洗衫 ~     

家姐今晚幫我去金飯碗買椰子油   佢自己又順便買埋廖孖記腐乳同大支余均益辣椒醬   支余均益係喺粉麵餐廳食果 d 咁大支   我覺得好搞笑   比我有排食   細細個成日用余均益撈蝦子麵   就咁已經好好味呢 ~  

家姐差唔多 7 點就到喇   之後我煮飯   佢就食零食同睇電視   咁我煮完就出去坐啦   一齊食菜   家姐見到炒飯咁多蔥就嚇暈   其實有蔥真係好好味架噃   不過我打完仗真係無咩胃口   無食到飯   再等埋里奧大人先食齋呢 ~    

家姐 8 點 45 分走啦   趕住睇電視   里奧大人就 9 點幾先番到屋企 ~       

是日晚餐 - 蔥油雞 + 蔥粒炒飯 + 油麥菜 

蔥油雞 - 今次用雞扒   之後用蒜頭 乾蔥頭 豉油 辣油 醋撈埋一齊   酸酸辣辣唔錯架 ~

蔥粒炒飯 - 用咗 $4 蔥炒   太多蔥   所以個飯好濕   再加埋隻蛋就更濕   真係好怕炒飯   嘩哈哈   同埋焗住喺飯盒係好大陣味   所以我一開個蓋   里奧大人係咁索係咁索   話咩味咁臭   嘩哈哈哈哈 ~   

油麥菜 - 仲係 $7/斤   所以又買黎食   點甜豉油好好食架 ~    

今晚諗住好快煮完飯   食完抖陣去徑步   不過搞掂哂所有嘢都已經 9 點   之後等埋里奧大人一齊食齋   食完洗埋碗都 10 點   咁唔徑喇   同埋個人有 d 散   今次計錯數   煲中藥真係最多煮 2 個餸   同埋 2 個餸都要蒸   咁唔駛嘥時間洗完鑊又煮呢 ~

里奧大人沖完涼就搽椰子油   勁香呀   勁想咬佢   不過我又搽咗 cream   唔係我都會搽   因為原來又唔係好立咋噃 ~

今晚佢好 happy 咁   做完嘢仲上網睇嘢睇到 11 點半仲未瞓    我頂唔住瞓先喇 ~