冬菇蒸雞翼 + 臘潤腸 + 腐乳唐生菜 ( 28-OCT-2013 )

( 28-OCT-2013 MON )

呢兩晚無開冷氣   因為覺得唔係熱   但我可能仲未適應到唔開冷氣瞓   所以瞓得唔係咁好   咁里奧大人半夜都會摸下我   睇下我熱唔熱   尋晚佢摸完我一下   又見我無冚被   所以就開番冷氣   咁朝早起身問佢係咪驚我熱   車   佢話其實係佢熱呀   抵啦   無啦啦換張厚嘅冷氣被   依家天氣係涼   唔係凍   我覺得唔需要咁快轉被住囉 ~

早餐食芝腿治烘底   唔知幾時會食厭呢   哈 ~

嘩   超勁眼瞓呀   大粒又全部唔喺度   真係無原動力做嘢 ~

Lunch time 又未餓   但又眼瞓唔想出街   所以就叮貴刁食喇   辣辣地好好味架 ~

之後打比里奧大人   佢無啦啦話冷氣費唔慳得   原來佢都超級眼瞓呀   嘩哈哈   抵啦   終於知道熱係幾辛苦呀呢   等佢成日話全世界得我一個最怕熱丫嗱 ~

放工去街市買菜   再去超市買嘢   番到屋企都已經 6 點半 lu ~

醃埋雞翼再浸埋菜   就飲埋碗隔隔夜湯   食埋湯渣   咁今晚就咁食 d 餸算架喇 ~

食完個人又好似精神 d 咁噃   所以又開始煮飯 lu ~

今晚我自己食先   里奧大人 8 點 15 分打黎話放工   叫我食飯先   嘩   我都食完啦   抖陣再拖埋地   超勁攰呀 ~

是日懶餐 - 冬菇蒸雞翼 + 臘潤腸 + 腐乳唐生菜 

冬菇蒸雞翼 - 呢個餸勁喇   我同里奧大人都覺得完全無味   嘩哈哈   佢仲以為我喺街買雞翼   我話我煮架   其實我用咗好小豉油同五香分醃咗 15 分鐘架咋   因為我驚好鹹   點知原來都唔入味嘅 ~     

臘潤腸 - 喺金飯碗買架   我 frd 話三花腸係三肥七瘦   唔知係咪因為新鮮   所以唔係硬柴柴   鴨潤腸又係好味   好多油分   唔會好乾   送飯一流 ~  

腐乳唐生菜 - $5/份咋   所以買啦   點腐乳好好食架   不過帶 lunch box 就煩 d   因為會出水   但我唔慣 lunch box 無菜   所以點都會帶 d 呢   最多放喺底 ~   

搞掂哂所有嘢就沖涼   抖陣就食生果   之後真係休息喇   今晚 11 點 15 分瞓喇   真係頂唔順呢   哈 ~   

之前喺裕華買嘅黑芝麻糕   我食咗之後真係好瞓 d 咁架   不過黑芝麻本身都好有益嘅   食多 d 都無妨呢