茄汁豬扒扁意粉 ( 3-OCT-2013 )

( 3-OCT-2013  WED )

尋晚 11 點瞓喇   仲一覺瞓天光   實在太感恩喇 ~

早餐食芝腿治烘底   食到悶   但又成日食   呵呵 ~

菇場唔忙啦   8 卦問我聽日帶唔帶飯   我話帶   之後又問我係咪買咗餸   我話我解凍咗豬扒   其實我無解凍架   不過唔想同佢食   依家唔想同佢食飯   係我煮飯嘅原動力   嘩哈哈 ~  

今日有 lunch box   食完有 d 眼瞓   唔知係咪飯氣攻心呢 ~

勁唔想去街市   突然醒起今日惠康 95 折   所以即去惠康   行下買下   差唔多 6 點 15 分先番到屋企   又要即煲中藥啦   之後又預備晚餐 lu ~

今晚我又食先啦   里奧大人 8 點半先放工   次次佢打黎問食咩   我都話總之係好嘢啦   佢就會長唉一聲   之後就一齊大笑架喇   然後我叫佢快 d 番啦   收線唔講喇   無聊 ~

是日晚餐 - 茄汁豬扒扁意粉 

茄汁豬扒扁意粉 - 今次勁喇   因為我超有心機煮呀   豬扒慢慢煎   意粉又用茄汁炒過   里奧大人都話好食   我見佢食得好快   咁即係代表好食   如果唔想食呢   就慢慢食   睇電視送飯咁   衰 ~

如果里奧大人打咗黎話放工   我會差唔多時間就會開閉路電視睇住佢   咁見到佢呢   我就會即刻開哂 d 飯壺蓋   心情靚呢   我就會將 d 食物放喺碗   我覺得咁樣食會開心 d 囉   因為我覺得飯壺有一種孤零零食飯嘅感覺   哈 ~

本來想去徑步架   不過里奧大人唔駛做公司嘢   咁我陪佢啦   呢個月佢會非常之忙   所以我想多 d 時間見佢呀 ~

我沖埋涼就食生果   好在我問問里奧大人沖完涼先食生果   定食完生果先沖涼咋   佢話食完先沖涼   之後佢食完就刷牙   因為想瞓呀   之後好在佢問我佢沖咗涼未咋   唔係真係入房瞓都似 ~