茜廊 @ 九龍灣 ( 27-OCT-2013 )

紐西蘭肉眼牛扒

紐西蘭鑊仔牛柳

酥皮忌廉湯

齋湯無料 @.@

蒜蓉包

( 27-OCT-2013  SUN )

今朝 10 點 20 分起身   懶下床之後   里奧大人話要番教會   所以即彈起身沖涼洗頭   之後就去食早餐喇 ~

里奧大人依家會加 $3 轉食出前一丁   湯底都深色 d

早餐又遲   所以都趕唔切番教會喇   咁里奧大人番屋企   我就去超市買雪梨同石榴汁喇 ~

呢排隻手背又痛   咁里奧大人問我係咪用得多 mouse 所以痛   不過我話無特別用多到啦   之後佢笑住話我打機打到手痛呀   咁又似 d 喎   因為我打完自己部手機   會再打埋佢部手機架   唉   真係要停一停喇又 ~

里奧大人知我手痛   所以佢熨哂自己 d 恤衫同西褲   咁我煲完雪梨蘋果水就我熨番   佢就做公司嘢   熨衫隻手係唔會痛   反而拎袋揹上膊頭嘅時候   隻手一屈就最痛   慘 ~

差唔多 1 點幾   家姐黎我屋企停車場交收   因為我買咗樽勁辣椒油同埋夏威夷果仁同埋鵝肝腸比佢呢 ~

熨完都已經 2 點 45 分   咁出去食 tea 喇   順便行一陣抖下氣   依家出街覺得凍添呀   不過就勁乾燥   要密密搽 cream ~

做開有條路   咁抹乾淨哂 d 嘢   再執埋零食柜就真係抖喇   今日做咗成日嘢   所以我一早講家今晚唔煮飯   唔想比自己咁辛苦呀 ~

里奧大人無啦啦記得之前佢家姐比咗張茜廊 coupon 10月31日到期   咁一定要今晚用啦   因為平時又唔知里奧大人幾點放工喎   如果 9 點放工   我都唔會去咁遠食 ~

呢間餐廳應該每枱都係用 coupon 架喇   因為以前無咁多人食嘛   最搞笑有個侍應同個客講呢度好嘈   好似街市咁   唔知點解   我接受到酒樓嘈   但唔接受到西餐廳咁嘈架喎 ~

經過淘大又買咗對鞋   不過我要嘅 size 要訂   咁無咩所謂啦   又唔係趕住着   所以我就訂 lu ~

番到屋企抖陣就沖涼喇   超勁舒服   依家沖完涼都唔駛開冷氣   實在太好喇 ~

今晚又打下機   又睇下雜誌都 12 點喇   但其實我又唔係好眼瞓   不過都要瞓囉 ~