麥當勞 ( 外賣 ) @ 屋企 ( 8-OCT-2013 )

( 8-OCT-2013  TUE )

今朝早餐要食飽 d   所以食奄列餐   但其實唔餓   所以食完好飽呀 ~

菇場好在唔忙咋   因為晏晝 off   唔想遲走呀 ~

等呀等   終於 12 點半   即打比里奧大人姐夫問佢咩情況   原來佢地仲執緊行李   我真係接受唔到啦   因為應該一早要執好哂家嘛   同埋臨飛前果幾日就要睇下再有咩再要補給   我最驚 d 嘢甩甩漏漏 ~   

本來諗住約埋里奧大人一齊去 lunch 架   不過佢姐夫仲執緊行李   又未買密碼鎖   咁我就自己早 d 去幫手啦   真係好感恩   可以喺文具舖買到密碼鎖 ~

買完都差唔多 2 點   餓到我呢   所以去麥當勞買雞腿包   再買多個豬柳蛋漢堡比里奧大人就上姐夫屋企喇 ~

一入屋坐低即食包喇   之後再問佢地有咩需要幫手執   原來佢地都搞掂哂   只係要個密碼鎖   佢地要 3 個架   不過我買咗 2 個唔同款先   咁知道佢地鍾意邊款   再叫里奧大人買埋喇 ~

尋晚講好 2 點可以出車   點知 2 點都仲未搞掂   call 車又唔可以即時到   所以最後 3 點先出發   今次一定要 call vand 仔   因為 3 大喼 + 1 printer + 4 個人   初初諗住係普通貨 van   估唔到係 Benz 貨 van   咁就坐得好舒服喇   佢地瞓哂覺添呀 ~

差唔多 4 點去到機場   但 Quantas 仲未可以 check-in   因為坐 8 點半機嘛   之後再行去 counter   估唔到已經換人   所以 4 點 10 分又可以 check-in   咁又好呀   唔駛拎住行李周圍走 ~

搞掂哂到差唔多 4 點半   大姑奶同 3 姑奶都到埋   所以去食嘢   佢地話去翡翠拉麵   不過我話唔去   因為佢地服務態度好差   咁晴晴又好想食雲吞麵   所以去美心快餐喇 ~

晴晴幾咁乖呀   我一喊呢   佢就會走埋黎掃我背脊   又話出黎做嘢之後會養我喎   我好勁架   第 5 位呀   因為佢會養爸爸媽媽 + 2 個姨媽   之後到我喇   地位無變過   哈哈   隔咗一陣   望到里奧大人   好敷衍咁話養埋佢喎   呵呵   其實晴晴由細到大都好錫我好痴我架   唔會叫我買嘢比佢   只係蝦里奧大人   但佢又會送生日禮物比里奧大人架噃   細過仲將零用錢儲埋我果份添呀   打牌又比 $100 我做本   細細個已經幾鬼豪呀   不過最經典係佢媽咪同我講   有次見到佢篇唔知咩作文   寫住舅母一天比一天美麗   我覺得勁搞笑   之前問番佢   佢話記得寫過   不過唔記得係關於 d 咩   點解會咁寫   細過真係好鬼識氹人開心呢 ~   

2 姑奶同兒甥生 5 點幾又到喇   坐下食下傾下   好快就到 7 點啦 ~

嘩   真係要離別喇   晴晴一去要 5 年   真係好唔捨得啦   去到離境區   影埋相傾多陣就入閘喇   喊到我心口好痛呀   頭又痛   喊得勁過佢阿媽   搞嘢 ~

同埋姑奶一齊坐 A22   今次架車好慢   差唔多 40 分鐘先去到九龍灣 ~

里奧大人仲要做公司嘢   所以我話買麥當勞番屋企食   唔駛等嘛   不過一日食兩餐麥當勞真係幾驚下 ~

番到屋企即開機洗衫   之後就沖完涼先食   爽鬼到呢   哈哈 ~

里奧大人 11 點做完嘢嘢   不過今日喊到好攰   所以我瞓先喇 ~