節瓜釀肉碎 + 青紅蘿蔔豬骨湯 + 喇沙拉麵 ( 8-MAY-2015 )

( 8-MAY-2015  FRI )

話咁快又到 happy friday   勁開心呀   因為聽日可以去行街 ~

早餐食奶油脆豬   睇陣報紙   話咁快又番菇場 lu ~

實在太好   可以 hea 到 lunch time   食完 lunch box 就出去買嘢   之後又去 759 睇下   估唔到會買到包鹽味波浪薯片   因為上次得 1 包咋   咁比咗家姐   依家自己都有得食喇   哈哈   買完即番菇場   因為條街好熱   哈哈 ~

鹽味波浪薯片 $15.8/包   7折之後就 $11.1/包

今朝去洗手間   隔離公司個女仔話好耐無見我   之後同佢講話依家要打卡   9 點前番到菇場   9 點已經洗完隻杯   以前多數 9 點幾先見到   依家應該唔會啦   哈哈   咁晏晝喺洗手間又見到肥妹   佢又係第一句話好耐無見   搞笑   之後吹陣水就走喇   唔鍾意喺洗手間咁耐 ~

其實之前同肥妹喺 lunch time 都間唔中見到   佢問我有無 ok 印花   咁啱我又有   咁就比佢啦   之後再 whatsapp 傾下計   同埋咁啱呢期里奧大人買好多雜誌   咁次次都有幾個比佢   佢勁開心呀   不過我話唔係成日咁多囉   哈哈 ~    

好嘢   又放工喇   今晚去街市買豬肉   之後就番屋企 lu ~

7 點 15 分正想煮嘢   咁啱里奧大人放工   咁就等埋佢一齊食呢 ~

8 點可以開飯喇   食完就洗碗   抖陣就去徑步 ~

是日懶懶餐 - 節瓜釀肉碎 + 青紅蘿蔔豬骨湯 + 喇沙拉麵 

節瓜釀肉碎 - 之前買咗 2 斤節瓜   依家先煮咗 1 斤   仲有 1 斤要下星期一先煮   咁我懶整蠔油芡汁   所以加咗條臘腸   咁有 d 味道嘛   哈哈 ~

青紅蘿蔔豬骨湯 - 媽咪煲架   其實之前諗定今晚煮瓜粒湯飯   所以先買咁多節瓜   但唔醒起媽咪會煲湯囉 ~  

喇沙拉麵 - 終於整喇   跟住個 step 煮   但唔止煮 7 分鐘囉  起碼 9 分鐘   d 麵條先林   但我真係麻麻地咁重奶味嘅嘢   真係好彩買 1 pack ( 4 包 ) 咋   唔係就大鑊 ~

好喇   抖到 9 點半就諗住徑步   我正想出門口   突然搞肚痛   要去廁所啦   之後又好暈   不過今次唔叫里奧大人喇   只係不斷祈禱   其實我合埋眼果下   我仲更加暈   哈哈   但堅持住唔好暈唔好暈   之後仲嘔埋添   真係好辛苦啦   嗚嗚嗚嗚 ~

出到黎   塊臉同口唇都白雪雪   嚇到里奧大人即沖杯黑茶比我消滯   因為佢話食完碗麵覺得好滯   同埋我又唔係咁受得咁重奶類嘅食物   好易搞肚痛 ~

之後佢問我仲有幾多包喇沙麵   我話仲有 2 包   佢叫我唔好落咁多奶   應該無事喎 ~    

抖都無咁暈就沖個勁熱水涼   沖完都仲覺得凍添呀   其實想關冷氣   不過又懶去關   我覺得凍真係唔方好嘢架   哈哈 ~

好攰呀   但睇下雜誌   都 12 點先瞓 ~