Subway ( 外賣 ) @ 屋企 ( 25-MAY-2015 )

Spicy Italian

( 25-MAY-2015  MON )

今朝約咗兒生女同姑奶 10 點半飲茶   所以 9 點半起身喇 ~

一開機收到家姐 whatsapp 話 B 頭朝早 5 點 10 分走了   嗚嗚嗚嗚嗚嗚嗚嗚 ~

喊完就打比家姐問情況   原來尋晚 B 頭都暈咗一暈   咁都 book 咗今朝 10 點睇醫生   但今朝 4 點幾佢抖氣好大聲   之後佢都有自己去廁所   家姐話之後再抱佢   工人話 B 頭失禁又屙血   其實都知乜事架喇   之後開始無咩氣   喺家姐懷抱走咗喇   工人同家姐一齊送別 B 頭 ~

7 點打比善終服務中心   7 點 40 分都到咗屋企接走 B 頭喇 ~

勁唔開心呀   不過我都預咗會有咁嘅一日   因為家姐成日都話 B 頭氣喘   情況同朱仔一樣咁囉  ~  

10 點左右出門口   估唔到佢地話到齊   咁搭的士去喇 ~

我地 10 個人飲茶   佢地要 2 盅飯   3 籠包   4 碟腸粉   我真係頂唔順話點解食埋 d 咁飽肚嘅嘢架   我覺得飲茶唔係咁囉   所以我都無乜點食   因為睇見都飽            

飲到 12 點就坐小巴去旺角   諗住去買公仔同電話套   今日勁熱呀   行兩行已經流哂汗   加上我又着咗水 boot   更加熱呀 ~      

又熱又眼瞓   頂唔買要買杯凍珍珠奶茶

里奧大人喺兆萬中心買咗套星矢   我就喺潮流特區買咗 2 個鎖匙扣   其實我有 d 餓   因為頭先無乜胃口食嘢   諗住求其食 d  嘢   不過里奧大人話佢想食傷心酸辣粉呢 ~

Chopper 同 SpongeBob ( $50/兩隻 ) / 電話套都係 $50       

我好鍾意海棉寶寶 ( SpongeBob ) 架   可能係黃色啦   同埋眼大大幾得意丫   但里奧大人同家姐話佢好樣衰   哈哈   我都認同   嘩哈哈哈     

食完就行去佐敦   經過永安又入去行陣   之後再行去買洗頭水   買完搭小巴番屋企   等咗 15 分鐘先坐滿   番到屋企 4 點 15 分   里奧大人無啦啦又話想食雞蛋仔   咁買囉   但我講明食幾粒架咋 ~

里奧大人話用咗呢隻洗頭水之後   覺得唔錯   所以買支大嘅  ( $195/1000ml )

沖個涼   抖陣就去睇戲喇   今日睇 5 點嘅 " 復仇者聯盟 2 "   睇完都 7 點幾   我食完爆谷好鬼飽呀   所以叫里奧大人去 Subway 買包番屋企食 ~

一個人食中爆谷算喇   但其實想食細架   不過差 $6   都係好似中爆谷抵 d   哈哈   

番到屋企咩都唔做喇   即沖涼   之後 hea 過   今日出咗成身汗   個人真係特別攰   所以 11 點唔夠就瞓喇 ~