大快活 @ 九龍灣 ( 10-JUL-2015 ) ( 禁 )

( 10-JUL-2015  FRI )

尋日打完風   無諗過今朝咁好天喎   不過天文台話會有狂風驟雨   我就着水靴啦   但里奧大人話唔駛喎   我話無乜幾何着   着下囉 ~

食完早餐   睇多陣報紙就番菇場喇 ~

忙下停下   今日仍然 load 相過日   呵 ~

勁想食酸辣米線   所以今日一定要食   順便幫埋阿齋買   之後我地不約而同都覺得今次 d 餸嘅份量多咗   所以我地今次勁飽   哈哈 ~

4 點家姐打黎話媽咪唔舒服 call 平安鐘   10 分鐘之後姑娘都打黎   之後再打埋比家姐   最搞笑係不嬲唔會打比家姐嘛   嚇到家姐以為乜事   哈 ~

放工即走   好感恩即刻有巴士   5 點 50 分去到醫院喇 ~

要入急症室探媽咪   原來已經等緊上房   差唔多 6 點半就上得房呢 ~

安頓咗媽咪   我就問工人咩情況啦   原來朝早 8 點幾已經唔舒服   咁晏畫開始仲更加唔舒服   話想死喎   嚇到工人喊住話唔好   ( 我其實覺得工人真係好好好好 )   之後媽咪叫工人幫佢祈禱   再話一齊祈禱   好感恩   媽咪識得祈禱尋求平安 ~

我同工人講   如果媽咪一話唔舒服就即按鐘   佢唔會鬧妳多事   因為佢都無氣鬧妳多事啦   心臟嘅嘢   一秒就一秒   我唔明點解媽咪係都唔第一時間按平安鐘   要忍到好唔舒服先按囉   講咗幾十次都係咁   好鬼煩 ~

好感恩今晚見到醫生   媽咪依家要聞 6 lite 氧氣   之後話佢右邊肺有肺炎   都幾大範圍   所以要打抗生素   之後話因為心臟唔好   所以引致到腳咁腫   咁我咪話囉   之前覆診係醫生話媽咪轉咗藥先令到隻腳咁腫嘛   醫生聽完都話唔會咁   唔會因為腳腫而心臟唔好   一定係心臟唔好先會腳腫   所以要打去水針   好感恩呢個醫生都好好人   有問必答又好笑容 ~

之後我鬧鬼媽咪啦   上月中都話如果真係食藥導致腳腫   副作用咁勁   唔食好過啦   叫佢入急症又唔入   因為次次腳腫就知心臟有問題   再唔係就因為糖尿病   成日懶醒話腳腫無問題   用腦都諗到啦   腫成咁仲話無嘢   頂佢唔順   不過見佢咁攰   我又攰   都費事再講 ~

今晚家姐開 OT   所以唔黎探媽咪   最搞笑係媽咪問家姐呢   我話佢唔黎   我完全唔記得講比媽咪知添   里奧大人又 7 點半先放工   都係探唔到媽咪   不過其實今晚探唔探都得啦   媽咪實好攰   佢都係瞓覺呢 ~ 

8 點鐘要走喇   咁啱姑娘話今晚媽咪會有好多節目   就係種豆啦   抽血驗嘢啦   吊 d 心臟藥水   等心臟好 d ~

等咗 10 分鐘先有的士   送埋工人番屋企先   之後再去九龍灣   諗住去元氣   不過要等 30 張枱就咪搞   其實我唔太餓   所以去大快活同里奧大人 share 扒餐算喇 ~ 

番到屋企抖陣就沖涼喇   睇陣電視   11 點即瞓   好攰呀 ~