上年撞正示威去唔到嘛 飲恨呀 所以我同里奧大人講 如果今次都去唔到 以後唔會去越南 哈哈 ~
好在今次去南越咋 因為北越 ( 河內 ) 打風呀 唔係咁邪邪邪呀嘛 ~
其實今次原本唔係去越南嘅 係諗住去山西嘅懸空寺 仲係玩足 8 日添 咁當然又係要成日坐車啦 我都預咗會係咁 反正上次去張家界都坐過 8 個鐘頭車 2-3個鐘頭車真係碎料啦 ~
之後諗諗下又想去大板京都 因為里奧大人叫咗我幾次去日本呢 咁自由行我又唔願 plan 跟團 5 日要接近 $9000 團費 加埋什費同導遊費 即係要 $10,000 我又覺得唔值喎 同埋我對日本真係無乜興趣 可能好耐之前去過東京 覺得都係好多人好急趕咁 但北海道又太 hea 所以無乜原動力令我想去日本囉 ~
最後我話去越南 實在想去耶穌山 我預咗熱架 但千奇唔好落雨就得喇 始終越南 6 月開始係雨季呢 ~
今次里奧大人醒喇 last minute 先做簽証 不過我都係驚去唔成 嘩哈哈哈哈哈哈 ~
當我去到越南 賓尼兔第一件事係叫我地千其唔好拎手袋出街 同埋拎相機出黎影相 因為電單車黨好猖獗 當下我非常之感恩 我無自由行 哈哈 因為我之前懶勁話會夜晚帶里奧大人出街周圍食周圍影呢 ~
但越南人其實都好友善嘅 起碼次次我影相 d 人都會對住妳笑 一係好熱情咁笑 一係好怕羞咁笑 特別係 d 小朋友 真係揮哂手架 好可愛呢 ~
停車嘅時候 我影佢啦 佢就笑哂口 之後開車 佢仲同我揮手 bye bye 添呀
天氣方面 - 感謝主 天氣真係非常之好 里奧大人喺越南 last day 問賓尼兔 27 號前嘅天氣係點 佢話係日日落雨呀 雖然我地去到都有落過雨 但我地非常之感恩 次次都避到 一次係一到越南食第一餐飯之前落 一次係第 4 晚食完飯番酒店之後落 一次係 Lucky Plaza 超市入面 同埋喺越南登機之前落 有數得計 有時坐車沿途都有落雨 但其實無影響 因為係番酒店呢 哈哈 ~
食物方面 - 100 分嘅話 真係有 85 分 因為我覺得團餐多數唔好食呢 連同枱團友都話好食呀 但最最最好味嘅食物 一定係賓尼兔幫我地買嘅法包呢 ~
喺頭頓食嘅海鮮午餐 燒大頭蝦真係好鮮甜好彈牙 正呀
HotPot 又係好味道
有奶嘅凍咖啡 ( 自費 )
無奶嘅凍咖啡 ( 自費 )
住宿方面 - 比我想像中好呀 因為我覺得越南係好落後 地方應該好污糟 估唔到都乾淨 起碼房間無塵 我好奇怪架 次次會睇埋 d 燈後面有無塵架 而兩間酒店都無塵架 所以覺得佢地真係好用心咁清潔呢 同埋 我去旅行其實最驚係去洗手間 因為好驚唔乾淨 但估唔到佢地所有嘅洗手間都好乾淨 讚讚讚呀 ~
@ Winsor Plaza Hotel ( 胡志明市五星級 )
@ Imperial Hotel ( 頭頓五星級 )
團友方面 - 同我地同枱嘅夫婦 + 1 對女性朋友都好啱傾 夫婦仲好主動叫領隊幫我地 6 個人一齊影相 一食特色餐就影合照 佢影我地又影 好開心呀 所以呢 5 日好快過呢 之後到機場 原來同其他團友都好啱傾 個個都鍾意去食去玩 妳介紹我去邊 我介紹妳去邊咁 所以我成日話跟團 食咩住咩都無咁緊要 團友先係最緊要呀 因為妳點都會對佢地幾日 每日一定一齊食兩餐飯 我唔想似搭枱 feel 呀 ~
今次最開心係當然去到耶穌山啦 但令我最震撼反而係戰爭博物館 因為見到 d 相 覺得佢地好慘 打仗實在太可怕喇 ~~~~
@ 耶穌山 ( 頭頓 )
@ 戰爭博物館
今次呢團總共得 14 人 所以坐細車 迫係迫 d 但我同里奧大人分開坐 所以無咩影響 呵 ~
次次去旅行 最開心嘅就梗係可以日日夜夜痴住里奧大人啦 佢點避都避唔到 哈哈 ~
去完越南之後 我覺得自己真係好幸福 起碼無經歷過打仗 同埋三餐溫飽 而越南經歷過可怕嘅戰爭 所以佢地嘅生活態度係 " 天跌落黎落被冚 水浸眼眉當酒飲 " 衷心希望越南國家繁榮 經濟穩定 每個人都生活得開開心心呢 ~
團費 HK$3,499 x 2
保險 HK$96 x 2
簽証費 : HK$700 x 2
代收機票徵費服務費 : HK$40 x 2
香港離境稅 HK$333 x 2
燃油附加費 HK$94 x 2
早報名優惠 : -HK$200 x 2
東亞東南亞優惠 : -HK$40 x 2
週末激減 : -HK$100 x 2
會員 : -HK$50 x 2
自費節目 : HK$510 x 2
越式熱石腳底按摩 HK$150/人
順化皇帝餐 HK$110/人
頭頓海鮮餐宵夜 HK$250/人
即係 HK5,392 x 2
兌換率 HK$100 ( VND260,000 - based on 旅行社兌換率 )
沒有留言:
發佈留言