叙苑粉麵茶餐廳 @ 九龍灣 ( 13-JUL-2015 ) ( 禁 )

( 13-JUL-2015  MON )

雖然尋晚早瞓   但都有 d 攰   不過都預咗   始終媽咪喺醫院   瞓得都唔係咁好呢 ~

早餐食芝蛋治烘底   umm   真係好飽 ~

番到菇場做埋 report 就搞掂哂最重要嘅工作   之後可以 load 相喇 ~~~~

今日好好天   我都想出去行下   順便去入票   之後就去食粥   阿齋話咁熱食粥   我話食粥無食酸辣米線咁熱呀   因為我次次食完粥   都無汗出嘅   反而食酸辣米線就一路食一路出汗呢 ~

   
諗住行啦   點知個天想落雨咁   咁行咗一陣就要番菇場喇 ~ 

放工即走   感恩去到有 11X   所以 6 點左右到醫院 lu ~

媽咪話今晚舒服咗 d   之後見到姑娘   就即問媽咪情況喇   今日照咗 X-Ray   不過未知報告   因為主診醫生今日唔喺度   聽日先知   但氧氣仍然要 4 度   同埋仍都要打心臟嘅藥水   血壓正常 ~

睇媽咪情況   都起碼要留一星期架喇   不過見到佢對腳都去哂水   咁都好 d ~

媽咪成日懶醒   我話依家對腳去哂腫   係咪即係有事呀 ?!?!?!   妳話醫生話食藥係咁家嘛   駛唔駛同番醫生講   依家腳唔腫喇   係咪有事呀 ?!?!   佢唔出聲啦   我咪話佢囉   因為腳腫令到氣速入院   唔係第一次   妳應該好有經驗   但妳都可以忍咁耐先入院   仲搞到埋肺炎   就係因為唔夠氣 pump 去心臟   所以腳腫   呢個係一個好嚴重嘅警號   妳都可能死撐話無事   麻鬼煩   我話我真係未必再晚晚探妳   我好攰   依家又出埋濕疹   我要休息   同埋妳自己攞黎   一早入院就唔駛又肺炎又剩 ~

今晚同家姐 7 點 40 分走喇   我唔想死咁多細胞   自己坐巴士落淘大   約埋里奧大人喺叙苑食嘢呢 ~

去茶餐廳食嘢   多數計咗數先   因為唔想找番 d 散紙   今晚里奧大人計咗話 $99   點知收銀用手指篤住張紙喺度計   話 $109   里奧大人話 $99 喎   條友用計數機計番   話係 $99 喎   一早應該用計數機計啦   又懶快咁一路幫人落單一路計數 ~

心情唔太好   真係人都火 d ~

番到屋企即開機洗衫   之後沖涼喇   抖陣再睇埋 " 人在囧途之泰囧 " 最後果 35 分鐘   估唔到結局咁有驚喜 ~

里奧大人 10 點 15 分就瞓喇   我就晾埋衫   10 點半即瞓   勁攰呀 ~