大快活 @ 九龍灣 ( 21-JUL-2015 ) ( 禁 )

( 21-JUL-2015  TUE )

今朝一起身   里奧大人第一句就同我講今日可以着水靴喇   哈   佢話我一聽到就笑   大佬   梗係笑啦   講到我好似好恨着水靴咁 ~

早餐食魚柳包   其實唔好食   不過唔想食多士   又食唔落麵餐   咁唯有食佢囉 ~

食完就出事   喉嚨痛呀   唔夠瞓真係乜都差 d ~

雖然 hea 住上網   但都真係無咩 mood 上網 ~

晏晝買車仔麵番菇場食   又係食剩一半   似乎堅唔舒服咁噃   唉 ~

媽咪轉咗去靈實   要喺官塘再轉 13 號小巴   去到都差唔多 6 點半   咁見到媽咪唔駛聞氣就實在太開心啦 ~

之後問姑娘   媽咪情況點啦   血壓心跳正常   不過血糖高   果下我都腦閉塞   只係諗到血壓高   諗唔到咩叫血糖高   要問番姑娘   之後話媽咪有糖尿病   血糖指數係 10   正常係 6   佢試過 15 添   依家就比藥佢食住先 ~

聽完之後我慶鬼到爆   之前一早話佢似糖尿病啦   個個都話碗糖水甜到爆   得佢一個食得哂   食燒鵝乳豬又點得好多醬   佢自己又話篤過手指無事   咁我實信佢啦   諗諗下都唔知有無篤 ~

咁家姐買咗蛋糕仔比媽咪   我話妳問姑娘食唔食得先啦   糖份咁高   之後家姐同媽咪話喎   佢無啦啦糖尿病係因為 d 病撞埋   所以引發到糖尿病   咁我就問佢喇   本身有糖尿病同因為幾樣病撞埋引致糖尿病   食咗落肚件蛋糕   糖份會有分別咩 ?!?!?!?!?!?!   同埋咩撞埋哂引致糖尿病係妳地自己諗囉   之後我用好認真嘅語氣同媽咪講   妳食咩無問題   妳鍾意食咩就食咩    血糖高咪打針囉   喺醫院怕咩   我無氣力再理妳   妳鍾意點就點 ~~~~

我今日已經唔舒服   攰又喉嚨痛   又作發燒   我勁想唔黎   不過家姐又成日唔問姑娘   媽咪咩情況   尋晚問佢媽咪聞幾度都可以唔知   所以我今晚點都要探   點知又係激鬼氣   所以我同佢地講   呢幾晚我唔黎喇   我番屋企休息好過   反正講咗都係咁   好煩   真係唔好煩我   我好攰 ~~~~

7 點 50 分走喇   坐小巴再轉小巴   8 點 40 分先去到九龍灣   咁今日里奧大人送 3 姑奶機   所以佢都食咗嘢   咁我話去大快活   快快趣食完番屋企呢 ~

沖埋涼   即飲杯 Hot Lemon   再睇陣電視   11 點瞓喇 ~     

之前同里奧大人講   話 Chopper 攬枕好得意   所以佢買比我喇 

最搞笑佢買咗呢隻比我先囉   但我其實都無話鍾意呢隻   不過買咗就要啦   哈哈  

咁樣拚埋   其實個攬枕係好細個呢 

每個附送一包軟糖   ok 好食啦