餃子豬骨拉麵 + 青紅蘿蔔豬骨湯 ( 9-JUL-2015 )

( 9-JUL-2015  THU )

今朝同里奧大人食早餐   好開心呀   同埋居然無遲到   實在太好喇 ~

番到菇場唔算忙   不過知道今日會打風   所以成日上網 check 住天氣   哈哈 ~

去完旅行   load 相係用得最多時間   感恩呢排無咩嘢做   不過 load load 下都要抖   對眼好攰呀 ~

里奧大人 10 點去佐敦見客   諗住見好耐   點知好快見完   仲 plan 好見完去千齊買 jel   點知又要搵地方坐低   去最近嘅大家樂食嘢   好勁啦   咁都食到 ~

千齊差唔多 11 點半先開   里奧大人買完即走   番到公司都 12 點半   佢話唔想半個鐘之後又落樓下食嘢   所以食埋先番公司   佢每兩個鐘食一餐   佢 line 相比我   我都覺得飽呀   嘩哈哈 ~

Lunch 食 Special K + 乳酪   其實我超勁怕食浸林咗嘅 K   所以次次要食得好快   好辛苦   今次終於醒啦   唔好一次過倒哂 d 乳酪   食一更就 "北" 一更   咁樣 K 又唔林   又可以慢慢食   點解以前無咁諗架   豬咗咁耐添 ~   

里奧大人同齋話應該 3 點掛 8 號風球 ( 蓮花 )   咁其實我地都走得啦   因為食完都 1 點半   咁掛 8 號之前 2 個鐘頭前可以走家嘛 ~

等呀等   終於話 5 點前掛 8 號   家姐 3 點就走得 lu   菇場就 3 點 15 分出 email   話 4 點可以番屋企   不過住離島就可以即走囉 ~

西瓜好好人呀   3 點 55 分出黎話可以走得   實在感動到想喊啦 ~~~~~~~~~~~~

我好感恩啦   去到巴士站即有車   不過今次真係見到乜車都搭   好記得對上一次打風   有車唔搭   等咗半個鐘先有呀   同埋今次唔多人   可能好多人 3 點已經可以走 lu ~

番到屋企抖下就開機洗衫   之後執下嘢 ~  

里奧大人就慘   4 點先黎開會   不過佢地公司係要掛咗 8 號風球先走得囉   勁 cheap ~

4 點 40 分掛 8 號啦   好在佢地嘅秘書入房講佢地知   佢地先可以走   唔係唔知開到幾點 ~

里奧大人 5 點半番到屋企   問駛唔駛出街食   我話唔駛啦   屋企大把儲備   之後佢話佢都可以食得   真係勁囉   咁我 6 點開始煮嘢啦 ~

最搞笑家姐又打黎問我食咩   驚我無嘢食   不如妳驚我食唔切好過啦   哈 ~

是日懶餐 - 餃子豬骨拉麵 + 青紅蘿蔔豬骨湯 

餃子豬骨拉麵 - 阿齋介紹話呢個豬骨拉麵好味   咁里奧大人又鍾意食拉麵   所以今晚煮黎食   味道真係 ok 喎 ~   

青紅蘿蔔豬骨湯 - 媽咪煲架   好在尋晚同咗媽咪食飯咋   唔係今晚就食唔到呢   咁聽日食都得   但驚落大雨好煩囉 ~

里奧大人佢習慣食完飯先飲湯   話飲完湯食唔落飯   但呢   食飽飯又飲唔落湯   痴鬼線   咁佢今晚有兩碗湯嘛   食完飯飲一碗   之後仲有一碗就抖陣先飲   咁我都灘喺梳化抖下啦   之後隔無耐就叫佢快 d 飲湯   佢問我嘢   我又會加多句快 d 飲湯   之後佢整鬼我   問我唔知咩   我答完佢之後仍然加句快 d 飲湯   哈哈   不過真係叫咗佢好多次快 d 飲湯呢 ~    

7 點幾就搞掂哂嘢喇   仲以為係 8 點幾添   其實出面無風無雨   勁想出去徑步 ~

10 點半瞓喇   睇新聞話短期內改發 3 號   估唔到阿花來去匆匆   不過我都預咗聽日要番工架喇 ~