大家樂 @ 九龍灣 ( 15-JUL-2015 ) ( 禁 )

( 15-JUL-2015  WED )

今朝里奧大人上大陸   鬧鐘響完我都即刻瞓到   呢排真係好攰呢 ~

早餐食奶油脆豬喇   唔想諗食咩 ~

菇場唔忙   可以 resize 相   呢排日日整相   眼都濛埋 @@

諗緊晏晝出唔出去好   因為難得好天嘛   咁夜晚又無得徑步   我想郁下   點知家姐打黎問我晏晝食咩   我話食卷蛋同 K   之後佢哦一聲   我問佢做咩   佢話想食丹麥酥方包同蜜桃酥   想我幫佢買   我話叫我買咪買囉   駛咩講咁多嘢喎   嘩哈   反正我都想出去   咁依家幫妳買嘢   我一定要出去   咁仲好 ~

又係好焗熱   不過後日天氣開始唔好   仲落埋雨   真係呢兩日要出下街喇   哈 ~

放工走人   6 點左右到醫院   媽咪今晚有 d 胃口   因為見佢食咗 2 片   同埋精神咗 ~

咁無啦啦聽到隔離病床嘅女人   好大聲指住探佢個男人講話你同大嫂通姦   阿x係你同大嫂個女   之後個男人出咗去   佢又話探佢個女人係蜘蛛精   勾引佢老公   咁有個小朋友喺度   係病人個女   個小朋友把聲好慘咁同媽咪講話呢度醫院   妳唔好咁大聲啦   我地個個都好關心妳架   我聽完之後   我替個小朋友心痛   咁細個其實都唔知發生咩事   但見媽咪咁激動   又唔知點好喎 ~

之後姑娘帶個小朋友出去   因為佢得 6-7歲   又無帶口罩   醫院多菌嘛   個女人係咁打姑娘隻手   唔比佢帶個女走   不過最後個小朋友都跟姑娘走呢   事實醫院真係超多菌   小朋友真係不宜久留   同埋好在個女人係比人縛住咋   我驚佢亂掟嘢   整親媽咪呀 ~

家姐 7 點左右到啦   咁佢又餓喎   即刻食叉燒   食緊嘅時候   咁啱個女人同佢笑   家姐就含住嚿叉燒同佢笑啦   咁就出事喇   無啦啦話家姐食嘢同人笑好無儀態   之後係咁講嘢   我地唔鬼理佢啦 ~

咁家姐洗手   之後個女人又好大聲話家姐洗手洗到成地都濕哂   又拎咁多紙巾好唔環保呀   咁我以為家姐真係拎好多張紙巾   原來佢只係拎兩張   咁姑娘聽到   叫個女人唔可以咁話人   因為頭先佢都用咗兩張紙巾   好在姑娘喺度咋   唔係個女人有排鬧 ~

最最最搞笑   無啦啦個女人指住家姐   同姑娘講話 " 我好唔鍾意佢   叫佢走 "   果下我真係忍唔住笑呀   話家姐勁樣衰啦   黎咗唔夠 10 分鐘就比人話足 30 分鐘   哈 ~     

今晚 7 點 45 分走   去到巴士站就有車   不過如果過唔到條馬路   我就趕唔到   點知家姐上身咁扯我行   我勁驚甩鞋呀   好真係好驚我搭唔到車   我話其實搭唔到唔緊要   反正我都要等里奧大人嘛 ~

諗住買壽司番屋企食   點知打咗幾次比里奧大人   佢都聽唔到   我驚佢同客講嘢   所以都唔再打啦   同埋喺條街度 15 分鐘   好鬼熱   要番屋企喇 ~

番到屋企唔夠 5 分鐘就打黎   話已經係彩虹   原來佢無 cancel 飛線   唔知我打比佢   我咪 line 同 whatsapp 都叫 call me 啦   又唔睇   之後我話囉   啱啱開咗冷氣   如果唔係就唔番屋企啦   所以我都唔關冷氣就落去大家樂食嘢喇 ~

食完都 9 點幾   番到屋企沖涼就休息喇   睇埋杜如風   11 點即瞓 ~