海皇漁港 @ 馬鞍山 ( 20-OCT-2015 )

叫咗一 set 推介小菜   3 樣只係 $278 
推介一 - 豉椒炒蟶子皇 ( 六隻 ) - 好味呀   啖啖肉    

推介二 - 金牌燒鵝 ( 例牌 ) - 我最鍾意食燒鵝皮   哈哈  

推介三 - 珍菌魚湯浸菜苗 - 清清地都好味架  

蝦籽蝦球燴柚皮 ( $78 ) - 柚皮都好入味   

狀元豆腐 ( $88 ) - 特登叫比姑丈食架   我無食呀   

深海龍躉斑翅 ( $268 ) - 之前同媽咪喺海港食係套餐就好抵   今次只係單叫都要 $268   佢份量都唔小架   我覺得佢好似成隻鑊拎出黎咁   哈哈     

仲有 d 燒肉同腐竹咁呢  

杏汁白肺湯 ( $138 ) - 呢個湯超級抵   如果屋企附近有海港   我實會每星期飲一次   成個湯係奶白色   材料又多    有馬蹄 白果 響螺 雞腳 豬骨 瘦肉   我覺得自己煲可能貴過佢添呀   哈 

( 20-OCT-2015  TUE )

尋晚瞓得唔錯   咁今朝里奧大人要入去機場睇嘢   所以我個鬧鐘就響先   咁喇叭向住自己   一響真係嚇鬼死   因為平時係里奧大人鬧鐘響先家嘛 @@

唔太餓   但唔想食甜嘢同蛋   所以又芝腿治 lu ~

菇場唔忙   勁正   依家抖得就抖架喇   哈哈 ~

Lunch 食番尋晚 d 餸再叮個超米   食完就同阿齋行一田   之後再去買杯凍奶茶就番去喇 ~

我驚 d 帶子會腥呀   所以我狂落黑椒呢

里奧大人 send 比我睇   但咩都唔講架喎   咁我知佢想話我知好多雀仔囉  

呢張就問佢係咪覺得地方好亂   無人執嘢 ?!   佢碌大對眼同我講   妳見唔到好多雀仔咩 ?!?!    喺機場入面喎 ?!?!   呀大佬奧呀   我手機睇之嘛   黑色一粒嘢以為係垃圾咋   你又唔寫有咩特別   咁我第一眼睇到係覺得亂丫嘛 @@      

今晚約咗叔叔嬸嬸 姑姐姑丈 家姐姐夫喺馬鞍山食飯   因為上次姐夫無到   難得今晚放假   所以一齊食飯喇 ~

放工即走 lu   家姐教我搭 85X 去馬鞍山   差唔多 6 點先有車   最衰自己懶行前唔睇牌啦   如果唔係 5 點 40 分已經可以上到車喇   嗚嗚 ~

咁我拎住一大袋嘢送比叔叔佢地   咁因為我唔識去酒樓   所以姑丈教我點行   咁我知道會經過商場   諗住喺商場先分好 8 份 Scarf   點知姑丈話 "一到商場就見到酒樓   我地就會見到妳"   嘩   講到好似一落車就係商場   咁我無理由比佢地睇住我點分嘢家嘛   所以嚇鬼到我喺巴士度分囉   好在落車之前幾個站   坐隔離果個就落車   落車前啱啱好分哂   趕到呢   真係人都顛 ~

去到商場原來要過條橋先到酒樓   去到酒樓都已經 6 點 20 分喇   原來得姑丈一個去拎位先   差唔多 7 點   家姐同姐夫 叔叔佢地都到喇 ~ 

里奧大人本來諗住黎   不過見完客太多嘢要 follow up   同埋聽日會陪叔叔去大嶼山   所以今晚要開行 turbo 做哂呢 ~

食下傾下都 9 點 45 分   因為姑丈都有 d 攰   所以唔阻佢地休息喇 ~

同家姐姐夫一齊去搭巴士   佢地話帶我去番巴士總站搭車   但都好似唔多識咁囉   周圍滕咁   我話妳頭先嘅巴士總站喺邊度架 ?!   佢又只係答我幾多號巴士   又話頭先唔係咁行   之後我話我帶番妳地去我個巴士總站搭車好過啦   噴水池直行之嘛   原來我同佢係同一個巴士總站   不過我喺商場正門入   佢地就坐扶手電梯上   唔怪之得成日話唔同路啦 @@

我唔識搭地鐵番九龍灣   所以跟佢地坐巴士嘛   坐 681 去大老山隧道轉車   要 $19 一程呀   坐咗 10 分鐘就到隧道口轉車   唔記得佢地搭咩巴士番屋企   因為我地一落車   轉個頭佢地就話有車   我叫佢地即走   我自己揀平 d 嘅車番九龍灣   哈哈   佢上完車   下兩架車就係 89X   好似 $7.1   算平車架喇   呵 ~

番到屋企已經 10 點半   即刻沖涼喇   11 點半要即瞓添呀   因為聽朝要 6 點半起身呢 ~