韓國辣椒醬焗魚 + 韓國辣椒醬焗雞翼 + 唐生菜 ( 8-OCT-2015 )

我覺得擺埋一堆好似豐富 d   同埋唔知點解   我覺得感覺無咁生勾勾咁   哈哈  

諗住就咁魚同雞翼唔夠飽   就淥咗 d 丸丸啦   順便清冰格食物   不過其實唔太餓   所以夾硬食   食到我好辛苦   嗚     

( 8-OCT-2015  THU )

唔知係咪個人熱氣   瞓得唔係咁好咁 ~

突然好想食 d 酸咪咪嘢   所以食熱狗餐   以前好鍾意用千島醬整沙律   但次次食到咁上下就覺得好酸咁   所以最後都係用番沙律醬整沙律算喇   唔想個胃唔舒服呢 ~

菇場忙下停下   所以 d 時間過得勁快 ~

Lunch 出去食韭菜餃麵   又係突然好想食韭菜餃   哈 ~

食完又行陣先番菇場   其實呢排唔想食咁多粉麵飯   咁樣可以瘦快 d ( 希望 ) ~

好嘢   話咁快就放工   今晚去街市買餸   依家天氣無咁熱   可以慢慢行   但人太多   想慢 d 都唔得呢   哈 ~

番到屋企即預備   之後開機洗衫   抖陣就煮嘢喇 ~

我發覺里奧大人 d 同事好鍾意食花生   今次又醒咗 d 比佢   話呢 d 花生好食喎   我覺得一般啦   只係脆囉   不過我覺得 1 條 4 粒好得意就真   咁一次食 4 粒   唔駛剝咁耐   哈哈

里奧大人之前同我講   話佢同事話有隻花生好辣好好味   咁奧話佢老婆超級為食   所以叫同事幫佢買喎   其實佢自己都想試啦 @@   咁今晚佢同事比咗包阿奧   原來係黃飛紅   其實之前唔記得買咩送過一包比我架   不過擺到過期就掉咗囉     

里奧大人 7 點半先放工   咁我都等埋一齊食 lu ~

是日懶餐 - 韓國辣椒醬焗魚 + 韓國辣椒醬焗雞翼 + 唐生菜  

韓國辣椒醬焗魚 - 之前媽咪比嘅魚   驚擺得太耐會好腥   所以求鬼其用辣醬醃半個鐘   之後用光波爐焗佢   諗住唔用油啦   點知表皮都唔脆   所以之後都搽 d 油   但表皮都係唔脆   呵呵   不過無所謂   因為我都係食魚肉   最緊要唔駛開火煎就得喇 ~

韓國辣椒醬焗雞翼 - 好耐無整雞翼咁   所以唔記得醃底味   只係就咁搽辣椒醬   但今次重手得滯   好鬼辣呢   最搞笑係家姐同冰姑問辣唔辣   覺得我好似好小食辣嘢咁   哈哈   同埋佢地問嘅嘢好多時都係相反   所以搞到我都答到亂哂   好似今晚咁   家姐問鹹唔鹹   冰姑問甜唔甜   好在我清醒  唔係又答到亂哂   哈 ~

唐生菜 - 懶呀   所以實係食生菜   最緊要唔駛淥咁耐呢 ~   

洗埋碗都 9 點   抖都唔抖就一齊出去徑步喇   今晚徑咗 45 分鐘   希望之後一個鐘啦   但就唔好咁夜先開始徑囉 ~

沖埋涼   睇陣電視   11 點幾瞓   其實有 d 攰   但又未去到好眼瞓果隻   不過點都要瞓囉   我真係唔想太夜瞓呢 ~