黑椒扎肉 + 西蘭花 ( 13-OCT-2015 )

( 13-OCT-2015  TUE )

好在尋晚瞓到   都叫做一覺瞓天光   感恩呀   不過今朝起身都暈一暈   好小會咁囉 ~

今朝無咁凍喇   但都唔係叫做熱   呢 d 天氣真係非常之舒服呀 ~

早餐食麥皮餐   唔食過真係唔知大家樂 d 麥皮原來好鬼稀囉   因為我第一次喺呢間茶記食麥皮餐嘛   估唔到就咁一碗麥皮都幾飽肚   加埋腿治同奶茶   咁嘅組合真係唔錯   因為腿治可以留番晏 d 先食   哈哈 ~

菇場唔忙   又可以做私人嘢喇   爽 ~

個 8 卦真係好鬼 cheap   真係 cheap 到無極限果隻   日日問我有無嘢食   真係識佢咁耐就問咁耐   好心啦   明知自己成日要食嘢就買嘢番黎食   唔好成日開口問人攞嘢食咁失禮嘛   男人老狗   同埋我話叫你老婆買啦   佢話佢係拎番菇場食   佢老婆唔知買咩   都發神經   咁你同你老婆講話你想食 d 咩咪得囉   里奧大人放喺公司 d 零食餅乾   都係我買架啦   好心佢地兩公婆啦   咪咁 cheap 啦   成日貪小便宜食人地嘅   兩公婆又超勁八   唔怪得咁登對啦   咁勁 cheap 嘅人   喺我人生真係第一次見架咋 ~

食完 lunch box 就出去惠康買嘢   今日九五折呀   買咗 8 罐粟米湯   之後又忍唔住買咗 2 pack 脫脂奶比媽咪 ( $58/2 pack )   呢兩日買親 d 嘢都好鬼重   不過唔想放工喺屋企附近買   好多時都無貨   如果明明有得買唔買   之後無得買   我會好激氣架  哈 ~

( $12.8/2 罐   買滿 $30 再九五折   即係 $6.08/罐   都算抵架喇 )  

放工即走   番到屋企浸好菜   又食個蕃鬼荔枝先   想快 d 食哂去呀 ~   

里奧大人今日 3 點喺灣仔見完客再行會場   所以差唔多 6 點半就番到屋企   不過未有飯食住喎   所以佢喺泰昌買咗蛋撻   買二送一   咁新鮮出爐   每人食咗個先   留番 1 個一陣再食 ~

唉   電飯煲無啦啦跳制   明明 set 咗 50 分鐘家嘛   咁我 5 點 50 分先煮   無理由 6 點半唔夠就煮好囉   因為我蒸咗臘腸   我驚唔熟呀   所以再煲多 30 分鐘   無啦啦多咗時間用   所以開機洗衫喇 ~

7 點終於可以開飯   但其實我好飽   嘩哈哈哈哈 ~

是日懶餐 - 黑椒扎肉 + 西蘭花  

黑椒扎肉 - 完全唔記得佢存在添   好在上次放雪糕月餅見到咋   依家仲剩番 1 條   下次想買法包夾黎食呀   希望整到好似越南咁好食啦   哈 ~ 

西蘭花 - 星期日喺 Taste 買咗 2 個   好似 $7.9   同埋第一次見咁大個   平時果 d 細細個架咋   但今晚食咗蕃鬼荔枝同蛋撐真係好飽   食剩差唔多 1 個西蘭花   所以要留番聽晚食咯 ~

里奧大人食埋半個蛋撻做飯後甜品   不過我真係食唔落   我話下次唔好再買   夾硬食好辛苦   所以我叫佢食埋果半個呀   我真係食唔落 ~

搞掂哂都 8 點 40 分   無諗過里奧大人咁早番黎   到頭來都要 8 點幾先去徑步囉 ~

徑到 9 點半就走喇   其實我可以再徑架   但里奧大人話想早 d 番屋企沖涼休息呢 ~

依家涼涼地嘛   里奧大人問我有無流汗   我話開頭果 20 分鐘真係無汗架   但之後 d 汗係咁流係咁流囉   原來佢頭先都以為自己唔會流汗   最後又係流咗幾多汗   所以做運動真係要起碼半個鐘   唔係就等如無做過咁呢   哈 ~

沖埋涼就食沙律   好在多蘋果   當食生果囉   尋晚今晚食咗   聽晚都要再食   次次食幾晚真係好驚   哈 ~

今晚 11 點有睡意   所以都即刻瞓喇 ~