宮保雞丁 + 鹹蛋節瓜肉粒湯 ( 9-OCT-2015 )

( 9-OCT-2015  FRI )

眨下眼   10 月又過咗 1/3   時間真係過得超級快 ~

今朝好開心呀   因為里奧大人 10 點去北角見客   所以就陪我食早餐喇 ~

菇場唔太忙   所以又清下 d filing   唔係又一大堆唔想整架喇 ~

Lunch 食 K + 乳酪   但其實 K 嘅份量得好小   得 6 啖咋   不過懶去沖麥皮   點知阿齋食超米   香到呢   所以搞到我勁想食粉果   又要出街  哈哈 ~   

去埋百佳買參蜜比里奧大人先   好難得買三送一   平均每支 $4.35 咋   所有買咗 8 支   重到呢   勁想自己有 4 隻手囉   唔駛咁辛苦   哈哈 ~

買埋粉果即番菇場啦   但粉果已經唔好食   之前 d 皮好煙韌架   依家唔同咗 lu   嗚嗚 ~

好嘢   話咁快就放工   去佳寶買皮蛋   可惜無 9 折   哈哈   不過我懶得去街市囉 ~

番到屋企要預備滾湯   之後就開機洗衫   抖陣就煮嘢   里奧大人 7 點放工   咁我都等埋佢一齊食咯 ~

是日晚餐 - 宮保雞丁 + 鹹蛋節瓜肉粒湯  

宮保雞丁 - 第一次煮呢個餸   覺得十分之好味呀   里奧大人都好鍾意食   所以我勁開心   同埋多得里奧大人同事包麻辣花生咋   因為有埋花椒粒同乾辣椒喺入面   唔駛特登再買   因為里奧大人同事講佢講   話食完 d 花生   剩番 d  花椒粒同乾辣椒會用黎炒餸   咁啱我又諗住整宮保雞丁 ( 走花生版 )   估唔到依家有包花生   可以大派用場   呵呵 ~   

鹹蛋節瓜肉粒湯 - 用咗 6 個節瓜仔煲架   加埋唔知擺咗幾耐嘅瘦肉   再加 2 隻鹹蛋下下火   不過里奧大人話無用啦   d 花生好辣呀   哈哈 ~

好喇   搞掂哂都 9 點 10 分   里奧大人話唔去徑步呀   我話點解   佢話夜喎   因為我成日話 9 點徑步好夜   但今晚超勁飽   所以我話要徑呀   所以女人真係特別煩   嘩哈哈哈哈哈哈 ~

今晚徑平路   徑咗半個鐘左右   其實我想再徑   不過腰痛   所以想番屋企   里奧大人話我今晚好勁   感覺我係可以再徑咁   係架   可惜腰痛之嘛 ~

沖埋涼就睇電視   依幾晚都睇 " 世界零距離 2 "   其實真係差唔多一年無睇 TVB 架喇   除咗新聞   而呢套世界 2 係令我同阿奧會坐定定睇嘅節目   因為方東昇好搞笑   同埋介紹 d 冷門嘅地方   所以我鍾意睇呢 ~

好感恩今晚 11 點有睡意   所以即瞓喇 ~