元氣壽司 @ 九龍灣 ( 11-OCT-2015 )

汁燒秋刀魚壽司 x 1

秋刀魚壽司 x 1

熟蝦牛油果卷 x 1

炸蝦卷 x 1
                                   

三文魚子壽司 x 1 / 芥辣八爪魚軍艦 x 1

三文魚腩壽司 x 2 / 左口魚裙邊壽司 x 2 / 三文魚壽司 x 2 / 羅韌香草赤海蝦壽司 x 6

軟殼蟹手卷 x 1

( 11-OCT-2015  SUN )

今朝 9 點 45 分起身   沖埋涼就落去食早餐   今朝想去大家樂   想食麥皮餐呀 ~

我好小喺出面食麥皮架   但今朝唔太餓   所以想食下麥皮   原來幾好味喎   甜甜地又滑   同我自己喺菇場沖嘅簡直係天同地   哈哈   我自己沖果 d 係非常之健康   因為係無味又鞋又寡   所以即同阿奧講話   妳要食我沖果 d 麥皮先係真正健康餐   哈哈   

人食麥皮佢又食麥皮   不過我果份已經係 last one   之後佢又想食唔知咩   但賣哂   哈哈   所以食雞扒囉   咁我可以同佢 share 食 

食完就番屋企抖陣   咁諗住番完教會就同媽咪飲茶   不過家姐又未 whatsapp 我   咁我打比媽咪啦   都 11 點喇   要差唔多番教會嘛   要約定時間飲茶   點知媽咪話家姐話 12 點去東海   但家姐又無同我講   所以我打比家姐囉   之後家姐話如果無雨先去   其實都無應承媽咪  哈哈 ~

見媽咪咁開心話去東海   咁我唔番教會啦   陪下佢   里奧大人要做公司嘢   所以唔去喇 ~

家姐 11 點 45 分車我   再接埋媽咪就去東海   要等 20 個 number 呀   家姐話應該等一個鐘   咁我同家姐周圍行下先   嘻嘻 ~

去番酒樓   仲有 5 個 number 就到我地呀   所以等多 15 分鐘就有位   好嘢 ~

薑蔥牛肉角 - 好味呀    

潮州粉果 - 個皮好靚呀   同埋煙韌   家姐問咗 2 次好唔好食   我話妳已經問咗 2 次   佢話佢知   不過我無答到佢好唔好食囉   哈哈     

臘味糯米包 - 懷舊嘢啱老嘢   哈哈   我鍾意食架  

沙薑雞腳 - 好香沙薑味呀   同埋我第一次見係用錫紙包住呀   咁仲有 2 隻未食   家姐就包番住   不過我話唔好包喇   唔係人地以為食哂呢  

雪山叉燒包 - 我好鍾意食餐包架   

酥炸魷魚鬚 - 媽咪鍾意食   但工人唔食   平時家姐同媽咪又食唔哂   所以今次我喺度就可以叫喇  

XO 醬炒蘿蔔糕 - 炸到一粒粒好味呀   

媽咪依家食嘢都唔錯   會食哂落肚   之後家姐話媽咪呢排都係食哂架   話之前唔知係咪想自殺先唔食嘢   我覺得家姐講自殺好搞笑   應該係用"放棄自己"嘛 ~

咁家姐又請飲茶   我話我請啦   佢夾住我銀包   懶醒   我仲有個袋仔裝 credit card 架   不過佢話唔知咩卡有 3 倍積分   咁佢比啦   下次我請 ~  

之後佢話媽咪工人好搞笑架   如果家姐比錢佢出去找數   佢會停一停先去拎數   但如果媽咪比錢佢拎數呢   佢就即刻飛出去找數架   媽咪都即刻話係啦   哈哈   所以我同家姐都覺得工人好錫我地架   同埋我話媽咪同我飲茶   我去完洗手間   諗住出黎坐多陣先找數   不過媽咪已經找咗數   家姐話點解咁好   佢話佢唔係咁囉   去完洗手間出黎   張單仲喺度   嘩哈哈哈哈 ~

話咁快就 3 點喇   入埋油就送媽咪番屋企先   之後再送埋我番屋企   今日家姐好攰呀   慘 ~

$32/包   喺優品 360 買架    勁想食好耐   之後同家姐講咗幾次買唔買好   最後都係忍唔住買

家姐同事比佢食   佢就比我食

因為我要煮咖哩   咁我去 Taste 買韓國薯仔啦   細細粒唔錯咁   之後行下買下   買埋 3 罐粟米粒 + 1 罐紅腰豆 + 1 罐細什果 + 1 樽脆煙肉碎整沙律   頭先我同家姐話遲 d 可能整沙律   佢話好味呀   咁即係佢都想食啦   咁今晚見到佢   我就整啦 ~

買開有條路   買多 4 支參蜜 + 3 罐胎菊 + 1 包韓國粉絲 + 1 pack 福字麵 + 1 樽 yellow mustard + 2 棵西蘭花 + 1 pack 甘筍   重鬼到我呢 @@

胎菊 - $68/樽   買二送一

番到屋企   里奧大人仲未做完公司嘢   真係好在佢無去飲茶   唔係有排做咯 ~

咁我要即刻整沙律喇   之後再煮埋咖哩雞   咁聽晚食就會入味 d 呢 ~

有煙肉碎嘅係比家姐嘅   另一盒係我嘅   而無醬嘅係里奧大人   其實唔要醬   真係唔知係唔係叫做沙律   哈哈

家姐就黎生日   我又懶煮   所以請佢去元氣食啦   哈哈 ~

大家又未餓   家姐 6 點幾上到我屋企坐一陣   之後一齊去攞位喇 ~

食到 8 點幾   今餐食咗 $288   又係扣埋 d 賞分 $30 $50 同 $80   只需要比 $8 就搞掂   好嘢   終於唔駛成日再心掛掛用賞分 lu   我覺得佢唔會揩埋嘅   咁遲 d 食都得   但最驚係佢搬咗地方   又要去番德福食就無咁方便嘛   所以拿拿聲用埋去就最好喇 ~   

咁諗住食雪糕   不過家姐話好凍呀   唔想食喎   咁唔食啦   上屋企食埋個月餅好過   我想快 d 清哂雪柜嘅嘢呀   哈 ~

抹茶麻糬紅豆 / 海鹽焦糖麻糬朱古力

朱古力味好食呀  因為好濃朱古力味呀

食完坐多陣   我送家姐去坐巴士   諗住一陣去徑步   點知落毛毛雨   即係無得徑啦   嗚嗚 ~

好感恩家姐唔夠 5 分鐘就有巴士   因為我之後行番屋企   開始大雨呢 ~

沖埋涼就休息喇   今晚痴咗   又 12 點先瞓呀 ~