( 4-NOV-2016 FRI )
今朝里奧大人同客上大陸 咁鬧鐘一響 我就同佢講: 你記得 我都未講完 佢已經答我: 我知道 我最驚佢上大陸無嘢飲 所以次次佢上大陸 我就最緊張 一起身就一定叫佢記得帶嘢飲呢 ~
瞓到 7 點 45 分就起身喇 今朝好快搞掂 可以快快出門口 呵呵 ~
今朝餓呀 早餐要食芝蛋治 ~
菇場勁忙 仲要做埋 Report 人都顛 ~
次次一忙就好快餓 難得天氣咁好 所以食埋 Lunch Box 都出去行下 行完先番嚟洗碗 因為我要避開去食飯嘅人群 一到食飯時間 想入 Lift 都難 lu ~
番到菇場 洗埋碗就即開工喇 ~
放工前搞掂哂 不過聽朝番黎都仲要做囉 ~
我同呀矮一齊搭 Lift 佢無啦啦問我忙唔忙 ?! 我話忙呀 之後佢話溫總將啲嘢比佢做 個死溫總居然話啲嘢係幫我做 我頂佢吖 我邊度有叫佢幫我做嘢喎 啲嘢係佢本身要做 關我鬼事 自己做唔哂就屈人 同埋佢成日一路做一路打機 以為用個 File 遮住部手機 人哋就唔知妳喺度打機 成日又驚死 叫我入一個 Payment Term 都搞咗我 15 分鐘 一路入一路話依樣唔好嗰樣唔得 我都忍唔住大聲話佢 妳搞掂先好再同我講 小小嘢就睇得出佢做嘢係點 ~
同呀矮傾咗成 15 分鐘 好在去到巴士站啱啱有車咋 感恩 ~
買埋燻蹄就番屋企 浸埋菜就熨衫 之後抖下 里奧大人 7 點幾都到上水 叫佢去到九龍塘打比我 咁我就開始淥菜同煮辛辣麵 咁之後我再打比佢 佢話已經喺屋企樓下 無諗過佢咁快到九龍灣 我話乜你咁快嘅 ?! 佢話好掛住我 想快啲番屋企見到我 我話慳啲啦 之後佢又話: 我真係好掛住妳㗎阿嬌 Oh Sorry 叫錯妳名 咁之後我都話: 我又係好掛住你㗎阿俊 佢一定無諗過我咁講啦 哈哈 佢笑咗好耐呀 阻住哂我煮嘢 ~
今晚好餓 咁每人一個辛辣麵 我已經比多啲里奧大人㗎喇 但我都覺得好飽 下次都係 Share 算喇 ~
是日懶餐 - 燻蹄 (外賣) + 西蘭花
燻蹄 (外賣) - 間唔中就好想食燻蹄 但其實細細個已經好鍾意食海蜇燻蹄㗎喇 但依家就好小食到海蜇 就算有都唔好食 都唔爽脆嘅 同埋有啲好似係假添呀 所以都係小食為炒喇 ~
西蘭花 - 尋晚買定 因為唔想拎住盒燻蹄周圍走 哈哈 ~
洗埋碗就沖涼 之後休息 lu ~
今晚 11 點瞓 里奧大人話唔開冷氣喎 咁好啦 如果半夜熱醒先再開啦 ~
( 5-NOV-2016 SAT )
尋晚瞓得唔係咁好 個肚谷住谷住咁 唉 ~
早餐食芝腿治 本來想食麵餐 不過無咩時間 費事遲到喇 ~
終於每月一到 好在忙到 10 點幾先有啲肚痛 食咗藥同飲啲熱水 又唔痛 以後係咁就好 lu ~
放工即走 咁里奧大人兒生仔教佢淘寶集運 咁我又未餓 所以行下莎莎同 Taste 之後差唔多到 2 點 就叫里奧大人一齊去大快活食下午茶喇 ~
食完番屋企抖喇 里奧大人 5 點幾出去舖頭幫手 我就沖埋涼 繼續睇電視啦 ~
9 點個肚開始唔舒服 又勁嘔 所以叫里奧大人自己食嘢 佢又係買麥記番屋企食 話最緊要快喎 佢一番到嚟 我都入房瞓喇 ~
( 6-NOV-2016 SUN )
今朝里奧大人 8 點起身 佢話番早堂再番主日學 之後就去姑奶屋企整嘢 我就繼續瞓 瞓到 1 點幾先醒 ~
里奧大人去 Piago 食埋下午茶就再去買手機比姑奶 番到嚟都 5 點幾 睇見佢都攰呢 ~
我就成日都係瞓下醒下狀態 但完全唔想食嘢 差唔多 9 點幾 里奧大人去 Circle-K 拎雜誌 仲食埋碗酸辣米線先番屋企 好少可見佢咁夜食米線呢 ~
其實我都係瞓下醒下 都唔知幾點同埋佢做啲咩 ~
咁抖多陣 我 10 點都入房瞓喇 ~
( 7-NOV-2016 MON )
尋晚個肚唔係話好痛 但瞓得好差 所以都係請病假 ~
瞓下醒下 差唔多 12 點幾先起身 ~
咁出廳睇電視啦 之後又係瞓下醒下 5 點就落樓睇醫生 感恩個肚雖然少少痛 但都接受到呢 ~
里奧大人 3 點見客嘛 咁我睇完醫生番到屋企 之後佢又番到嚟 lu ~
我仍然完全無胃口 所以佢買燒味飯番屋企食 抖陣就去徑步 ~
咁見佢徑完步沖埋涼 之後拎支啤酒出嚟 我話做咩飲啤酒 ?! 佢話好想食薯片 我話你咁食法 不如頭先唔好徑步啦 哈哈 不過我見佢想食薯片 我都覺得佢想 Relax 我都開心嘅 起碼有樣嘢令到佢 Relax 嘛 ~
我 10 點半都瞓喇 希望瞓得好啦 ~
沒有留言:
發佈留言