豉油王煎蝦 + 螺片生菜 + 蕃茄薯仔魚湯 ( 14-NOV-2016 )

( 14-NOV-2016  MON )  

尋晚碌到差唔多 2 點先瞓到   慘鬼   所以今朝勁眼瞓 ~

今朝又餓餓哋喎   可以食奄列餐 ~

做埋 Report 又忙忙忙   所以 Lunch Time 都係出去食嘢抖抖氣 ~

好想食甜嘢同香口嘢   咁去食炸兩同紅豆沙   好在食完無生 "飛滋"   哈哈 ~

里奧大人話見同事食麥片早餐   佢又話食喎   咁即做嘢啦   第日佢食完又話好甜   食完好反胃喎   叫我唔好買   我叫佢比我食啦   佢又話唔駛   麻麻煩煩 

仍然忙啦   忙到唔想做添 ~

放工去街市買餸   番到屋企都 6 點 15 分   即開機洗衫   同埋今晚好多嘢要切要浸   所以抖都唔抖要預備喇 ~

見到啲湯嘅顏色好靚   好似好好飲咁   當堂開心哂 

里奧大人 7 點幾放工   咁今晚煮辛辣麵   我叫佢去到鑽石山打比我   咁我再預時間煮麵   但其實佢一話放工   我已經開始煮嘢   咁我再打比佢   問佢喺邊   佢話喺黃大仙   我好大聲話喺黃大仙 ?!   佢好愕然點解我咁大聲   因為下個站先係鑽石山嘛   之後我話唔好意思   我記錯咗以為你去到九龍塘要打比我   哈哈   無計啦   煮緊飯講嘢   個人係比較亂啲   所以佢成日覺得我煮飯係好緊張   不過我都覺自己好緊張㗎   哈哈 ~    

是日晚餐 - 豉油王煎蝦 + 螺片生菜 + 蕃茄薯仔魚湯

豉油王煎蝦 - 好想食蝦   本來想茄汁蝦   不過唔想煮飯   咁里奧大人 Lunch 又食咗茄汁雞扒飯   咁今晚又茄汁蝦又蕃茄湯   好似全日蕃咁   所以都係豉油王好啲   即上網睇點煮   其實今次個汁係好味   但鹹咗啲   如果唔係就正喇   呵呵 ~   

螺片生菜 - 呢罐螺片其實 10 月頭已經到期   但我聞咗無臭味   所以照食   最多我食多啲   哈哈 ~ 

蕃茄薯仔魚湯 - 好耐無飲湯咁   係時間要煲啦   1 條紅衫魚要 $25   堅貴   但我唔想煲排骨湯囉 ~

里奧大人食完飯即幫冰菇去淘寶大平反   我洗埋碗就沖涼 ~

11 點瞓喇   勁眼瞓   哈哈 ~