糖醋骨 + 豉汁蒸排骨 + 粟米蛋花湯 ( 1-NOV-2016 )

( 1-NOV-2016  TUE )

尋晚早瞓   其實都 OK 精神   但成日半夜要去廁所   如果一覺瞓天光就好喇 ~

又唔係咁餓   早餐食奶醬多啦 ~

菇場唔忙呀   可以做自己嘢   最鍾意張枱整整齊齊   但其實公司枱應該係整齊嘅   來來去去都係放 File 同紙   點疊都疊到整齊啦   但我見幾個同事啲紙係放到就嚟 "冧" 咁   都唔明點解佢哋接受到   同埋有啲紙都好黃下   好多虱家嘛   我見姑奶啲又係又黃又唔掉   一開就見到啲虱   嚇死我 ~

11 點幾開始餓   最慘係呢個時間餓   因為一定要食嘢   哈哈   所以菇場一定要有零食   食粒朱古力都好吖   可以頂到 Lunch Time ~

一到 12 點半即飛去按 Lift   已經好餓   但點都要幫里奧大人入票先   之後再飛去食粥   食完又周圍行下   真係好唔錯呢 ~

仍然 Hea 過   放工即番屋企 ~

番到屋企就煲麥茶   之後預備哂啲材料   抖陣就再抹柜   里奧大人一話放工   我就即煮   佢番黎就有飯食 lu ~

佢差唔多 7 點放工   煮完排骨再炒飯   時間真係啱啱好咋 ~  

是日晚餐 - 糖醋骨 + 豉汁蒸排骨 + 粟米蛋花湯 

糖醋骨 - 買咗 $30 排骨   唔想食一款味道咁單調   咁我之前又買咗支烏醋   所以想整糖醋嘢囉   今次都 OK 好味   但甜咗啲   下次整有骨好啲   啖啖肉再加上甜   好漏咁 ~

豉汁蒸排骨 - 里奧大人唔鍾意糖醋嘢   咁就整豉汁比佢啦 ~   

粟米蛋花湯 - 其實今晚食飯就唔想飲湯   因為知道會好鬼飽   但無啲蔬菜食下   唔知點咁   所以最後都煮粟米湯   果然飽到上心口 ~

搞掂哂就沖涼   直頭刷埋牙添呀   實在太飽   根本連生果都食唔落呢   哈哈 ~

今晚 10 點半即入房瞓   里奧大人覺得好奇怪   點解唔睇煒哥   佢知我鍾意睇飲食節目嘛   但我話超級攰呀   只想瞓覺   哈哈 ~