叉燒醬焗雞膇 + 蒜蓉豆豉炒油麥菜 ( 16-MAR-2017 )

( 16-MAR-2017  THU )

又係潮潮濕濕天氣   個人又攰又無咩胃口   食多士最好 ~



菇場忙呀   咁都好㗎   無咁眼瞓   哈哈 ~

Lunch Time 出去買車仔麵   食來食去都係呢幾個餸有啲悶   但其他餸又無咩興趣咁先慘 ~

仍然做做做   好快又放工喇 ~

番到屋企抖陣   真係好攰   所以 Hea 喺梳化抖   里奧大人 7 點半放工   我要預備 lu ~     

咁今晚煮擔擔麵   順便想快啲清埋樽特辣擔擔麵醬   其實 27/03/2017 到期   我一望個日子   以為過期好耐   真係無計   慣性睇過期日子   哈哈 ~

是日懶餐 - 叉燒醬焗雞膇 + 蒜蓉豆豉炒油麥菜 

叉燒醬焗雞膇 - 唔想成日蜜糖焗雞膇   所以上網睇有咩食譜   一睇就睇到叉燒醬焗雞膇   咁就正喇   因為我仲有一樽剩咗少少嘅叉燒醬   咁可以清埋去喇   我問里奧大人好唔好味 ?!   佢諗都唔諗話好味   我勁開心呀   同埋我叫佢唔好食雞皮啦   今次焗得唔夠脆   同埋又燶喎   但佢話好味要食埋呀   我話咪食埋燶嗰啲喎   佢今餐除咗慢食菜   食雞膇同擔擔麵都食得好快呢 ~

蒜蓉豆豉炒油麥菜 - 又係唔想咁悶淥菜   所以淥熟啲菜   再爆香蒜蓉豆豉   之後再一齊炒   咁樣就最方便   因為炒菜時間比較耐   咁我個鑊又唔係好大   要慢慢落啲落啲咁炒   用多一陪時間㗎 ~          

食飯佢又 Check 下有無數據   我問佢係咪盼望奇蹟出現 ?!   真係都唔知佢 Check 嚟做咩   哈哈 ~

搞掂哂就沖涼   睇多陣電視   11 點都瞓喇   臨瞓前會熄手機   里奧大人無啦啦好激動咁揸住手機   望住部手機講 : 過多一個鐘就係一條好漢喇   我問佢係咪等淘寶 ?!   佢話過多一個鐘頭就有番數據用 ~