辣肉腸炒銀針粉 + 油麥菜 + 陳皮百合蓮子紅豆沙 ( 8-MAR-2017 )

( 8-MAR-2017  WED )

尋晚瞓到半夜熱醒呀   以為發夢啦   點知原來係真嘅   再摸下條頸   係濕哂呀   勁想起身沖涼   所以都係瞓得唔好呢 ~

里奧大人今朝上大陸   我都係瞓下醒下咁囉   鬧鐘一響都可以即刻起身 lu ~

今朝去另一間食早餐   咁 8 卦又嚟   之後又話遠   麻鬼煩   又係佢叫我去另一間嘅 ~



菇場唔太忙   唔知係咪天氣潮濕關係   瞓又瞓唔好   好在又唔係話太攰咋   唔係就慘了 ~

Lunch Time 仲未餓呀   咁行下一田   再周圍行下先買個菠蘿叉燒包番菇場食呢 ~

無啦啦又忙   之後又忙下停下   所以好快就放工 lu   買埋蓮子百合麥冬就番屋企喇 ~

番到去就煲紅豆沙   搞掂就熨 2 機衫   之後又抹下櫃   望下鐘都已經 8 點半   開始煮嘢 lu ~

里奧大人要番公司拎文件   成 9 點先番到屋企呀   好在我今晚唔餓啫   呵呵 ~

是日懶餐 - 辣肉腸炒銀針粉 + 油麥菜 + 陳皮百合蓮子紅豆沙

辣肉腸炒銀針粉 - 加埋蒜芹一齊炒   勁好味呀   最開心係清哂包辣肉腸   唔駛又等過期先食呢 ~

油麥菜 - 我加咗啲芹菜葉一齊淥   唔好嘥嘛   咁里奧大人食咗條芹菜葉   之後乸埋塊臉話好腥   不過我無理佢   反正講完佢都唔記得 ~   

陳皮百合蓮子紅豆沙 - 好有心機煲家嘛   煲咗個半鐘   又壓成蓉   隻手攰到呢   拎隻碗都無力呀   咁好期待好興奮咁試啦   我頂   試咗 3 次都係苦嘅   但里奧大人又話無苦   不過我都會倒咗去架喇   因為里奧大人話益嘅果仁好味道   所以我一定唔會信佢呢   哈哈 ~

搞掂哂都 9 點幾   即沖涼喇   再睇埋千奇百趣就瞓 lu ~