麻辣串串香 @ 九龍灣 ( 17-MAR-2017 )

( 17-MAR-2017  FRI )

今朝問里奧大人凍唔凍   佢答我話少少凍   之後即刻好開心話終於有數據   真係好緊張數據喎   哈哈 ~

早咗出門口   又快咗 10 分鐘到茶餐廳   咁食奄列餐啦   可以慢慢食 ~



菇場忙呀   又西瓜效應   衰 ~

Lunch Time 出去行幾個大運   之後就買包番菇場食   今日突然間好想食包呀 ~

仍然忙   好在放工前搞掂 ~

里奧大人 3 點喺太子見客   所以 5 點幾已經到九龍灣   咁我話食麻辣燙   因為好耐無食喇 ~

食完就番屋企   里奧大人去姑奶屋企整嘢 ~

番到屋企即拖地   之後沖涼再開機洗衫   諗住唔熨衫住   點知啲衫好似乾得 9 成   咁要熨啦   仲諗住抖下添 ~      

里奧大人 9 點左右番到屋企   佢沖完涼就洗皮鞋鞋底   皮鞋鞋底喎   我話咁奇怪   無啦啦洗鞋底   我心諗係咪都知姑奶屋企勁污糟   費事有菌帶番屋企呀   因為佢真係無試過洗皮鞋底囉   同埋真係習慣要洗   點會着咗幾個月先洗呀 ?!   我都費事篤穿佢   哈哈 ~

之後佢又 8 婆聲話我 : 妳無洗鞋底㗎 ?!   仲成日話自己好乾淨   阿 mi 排第 2   妳排第 1   哈哈   黐鬼線   我覺得佢好搞笑   無啦啦講阿 mi   咁即係喺佢心目中阿 mi 都係乾淨   又唔見話姑奶 ?!   哈哈 ~

差唔多 10 點就食薯片   無啦啦勁想食呀   真係肥死了 ~

睇埋電視   11 點半先瞓   正想瞓嘅時候   加拿大堂妹 Messenger 我   咁傾咗幾句   知佢發生啲咩事   之後佢話 Wanted to call you and tell you   但我好眼瞓呀   所以叫佢聽晚先打比我呢 ~