BBQ @ 咖啡灣 + MIMI 屋企 ( 25-MAR-2017 )

開始起爐喇   里奧大人好認真咁揀炭呢        

 

佢地參考咗上次尼泊爾人嘅起爐方法   再加上阿 mi 上網睇嘅起爐方法   所以好快搞掂   

今次加 2 粒炭精   最搞笑有啲炭精碎跌咗落張櫈度   嚇到以為有一隻隻嘢   



各司其職   個個都好忙 (除咗我)   哈哈哈哈   里奧大人上次話   如果再 BBQ 就要帶定啲枱布   咁就唔駛怕啲櫈污糟   算佢都幾上心啲細節嘢   哈哈         



同類人阿 mi 又係勁細心   上次燒完嘢食已經話要淘個大箱   咁可以放哂啲袋入去   無咁易比人偷   同埋放埋啲褸入去   咁就唔駛吸哂啲味       



今次預少咗食物   寧願唔飽就夜晚再食多餐   因為上次預太多喇   阿 mi 打後要食 3 餐先清得哂   真係好怕佢食到驚   哈哈哈哈     

話少   其實都唔少   



我覺得肉類份量啱啱好   



阿 mi 整嘅泰汁同蒜蓉   

我負責將食物放喺櫈   之後再諗住幫阿 mi 手啦   點知佢已經搞掂哂   唔怪得阿喂成日話我扮嘢話幫手啦   大佬   又唔知佢老婆幾咁快手喎   哈哈   佢快手嘅情度   係我完全無見過佢拎嘢出嚟   但再望嘅時候   佢已經擺好哂啲嘢囉 



阿 mi 搞掂哂就幫手起爐   事實我真係無咩幫手   哈哈   多謝佢哋咁錫我 33

用心噴火槍   哈哈哈哈  



里奧大人話火槍好玩   無情火   火無情呀大人    

噴多幾噴就好大火了    



原來可以租帳篷   好似 $200/5 小時   感恩我哋燒咁耐都無落雨呢 

好好火呀   開始燒嘢食喇   阿喂話好餓呢



阿 mi 不停係咁快手反啲玫瑰腸同蝦卷   唔係就好快燶㗎喇   因為太好火了     



妳影我影妳   一齊影相最開心  

好味    

生果盤   阿 mi 話買咗血橙   好味呀  



今次我要求阿 mi 整酸啲嘅泰汁   好好味呀   我蘸哂成碗呀      



個火咁靚   就咁燒豬扒就嘥哂   所以之後即燒埋其他嘢   哈哈



就咁睇好似好乾身   但其實唔 "鞋"

咁樣剪就大家易食啲   上次我喺鯉魚門買豬肉乾   佢哋真係剪到咁大塊比人試食㗎  

大扇貝同魚   



呢啲海鮮類   一定要阿 mi 負責燒   唔係就會嘥料   呵呵



又係勁好味道   睇見又想食了 



阿 mi 又特登買牛仔骨比我同里奧大人   但只買一塊   我覺得絕對夠囉   上次佢買咗每人一塊牛扒比我哋   食完都飽飽哋咁呀   反正自己夾   我覺得樣樣少少就最好   始終紅肉好滯咁呢 

阿 mi 話今次係紅鮪



阿喂唔鍾意呢啲口感   話有啲鞋   阿 mi 即指住我   話我最鍾意食鞋嘅魚   哈哈   今次真係好味喎   又係睇見都想食   哈哈      



今次有 100 Plus   所以阿 mi 話要直接燒蜆   哈哈 

脹卜卜又 Juicy   正   



繼續由主廚鍾 mimi 負責海鮮類   



一隻放哂入口   無比幸福   哈哈哈哈  



係時候要食番啲蔬菜類喇   有羊角豆同南瓜   中間果盒係蠔   最搞笑阿喂叫我估係咩來   但唔夠 2 秒就話係蠔   咁問我做咩喎



雖然羊角豆有種滑潺潺嘅口感   但我完全接受到喎   因為係健康食物嘛   阿喂就話唔好食   個皮咬唔開   見佢食到個樣好痛苦咁   但我成條咬到喎   佢勁似里奧大人   唔鍾意食就話依樣嗰樣   呵呵



我都鍾意食蠔㗎   不過我唔識揀   所以唔敢買囉  

金沙骨   我將有骨嘅放喺最猛火位置   咁阿 mi 一見到   就好似話點解放到咁 ?!   佢以為係阿喂放定啦   哈哈   之後里奧大人勁開心指住我   話係我放㗎 (佢心諗抵死比人鬧)   但阿 mi 知係我放就無再話喎   哈哈哈哈   原來阿 mi 話咁樣放係唔平均   有啲快熟有啲未熟咁唔得呢   因為有啲都好厚肉嘛   所以我都成日話我唔識煮嘢㗎啦

我同里奧大人講話好有心機燒噃   佢竟然答我 : 用心燒麵包   哈哈哈哈   聽得我哋講 "用心" 多呀呢



加埋牛油同蜜糖   真係好味道呀   連阿喂都話好味   因為阿喂唔係咁鍾意 BBQ 食麵包   上次我哋都有燒   佢都無食啦   勁唔比臉

呢個漢堡餐包好味呀   外脆內軟   如果我住阿 mi 附近就好啦   可以成日一齊去買嘢食   好味嘅嘢又可以即刻 Share   如果家姐再住埋附近   我就發達喇   成日可以開大食會了   哈哈

必食蕃薯   我覺得影到右手邊隻蕃薯   好似隻豬仔月餅咁   哈哈    

我今次連皮食添呀   因為我知道阿 mi 擦得好乾淨   唔係唔會咁食囉   哈哈      

南瓜又係好味喎   燒嘢食真係要食啲蔬菜中和下   無咁滯        

烤魷魚   加埋燒汁超級正呀   好在阿 mi 有烤魷魚呢個好提議   呵呵       



我唔知雞翼熟未嘛   咁我叫阿奧問阿 mi    阿 mi 話問識煮嘢嗰個啦   衰奧勁大反應話   就係識煮嗰個問妳熟未啊呀   依家隻衰奧   下下串到行

椰菜 + 唐芹   熱辣辣好味呀   但男士們話飽喎   

( 25-MAR-2017  SAT )

今朝其實可以瞓到 10 點   但我瞓到 8 點幾都醒咗   但里奧大人未醒   咁就等佢瞓啦 ~

9 點左右佢就醒咗   第一時間望街   睇下有無落雨   哈哈 ~

無落雨就勁開心啦   即 Line 阿 mi   話佢知我哋醒咗   可以如期燒嘢食喇   勁開心 ~

我特登請咗半日假   因為想多啲時間見面傾下偈   但其實今次 BBQ 都真係要睇天氣而定   要是落雨就轉為飲茶 + 打邊爐   所以阿 mi 話等到 10 點   再睇天氣就知道 B 唔 B 到喇   感恩我哋可以如期 BBQ 到呢 ~

里奧大人話有啲餓   咁去麥記 Share 食一個早餐   食完即番屋企沖涼   搞掂哂都好似 11 點半   要出發喇 ~



今次勁呀   我哋自己去阿 mi 屋企   不過就要阿喂 Whatsapp 寫低點行   好在里奧大人都跟阿喂行過一次   咁佢都有啲印象   同埋全程直擊報導   去到一個地方就影比阿喂睇   佢話 OK 就繼續行   勁有探險 Feel   哈哈 ~

去到阿 mi 屋企   阿 mi 已經好忙咁執緊 BBQ 食物同用品   我覺得勁有旅行 Feel 咁呀   哈哈   不過原來都好多嘢執下   見阿 mi 寫哂成張紙   咁下次我地可以早啲上去幫手   但衰喂話我唔搞亂已經好幫忙   哈哈 ~

搞掂哂就 Call 車去咖啡灣   我同阿 mi 傾緊偈   傾傾下阿 mi 叫我望下前面   原來落緊毛毛雨呀   好在仲未到咖啡灣   咩都唔講   即急切祈禱呀   感謝神保守   去到已停雨呢   感恩感恩 ~

去到已經 1 點   阿 mi 先搞笑   一去到個場   好開心話無人呀   咁代表我地可以揀位坐嘛   呵呵   咁我同里奧大人講話   阿 mi 一去到個場話無人   佢以為係驚無人去   因為啲人擔心會落雨   哈哈 ~

咁今次好快起好個爐啦   阿喂話因為好靜   所以好快搞掂   里奧大人就好認真諗緊點解話好靜 ?!   係咪因為個場無人 ?!   我話阿喂話好靜嘅意思   係話緊我無喺度嘈嘈閉   又無阻住哂佢呀   因為佢成日話我講嘢好大聲   哈哈 ~

阿 mi 今次又特登買咗 6 罐 100 Plus 比里奧大人   真心感激佢   因為 6 罐已經好重   再加埋其他食物就更加重   同埋佢成日記住里奧大人要清熱氣   呢下堅滾動呢   33 ~

最搞笑阿喂居然唔記得拎 5 支樽裝茶   所以阿 mi 只可以飲 100 Plus 同啤酒   但佢就一定會留番 100 Plus 比里奧大人   所以迫佢咁早飲啤酒   哈哈 ~   

天陰陰   



其實同阿 mi 咁多次飯聚   我依家啲飲食習慣都唔同咗   會鍾意逐樣上慢慢嚟   唔夠再叫   以前我唔係㗎   鍾意一枱嘢都係食物呢   食唔哂就由佢   依家唔會咁 lu ~   

食下燒下又傾下   之後傾傾下開始有啲凍   仲有啲眼瞓咁   唔知係咪 B 氣攻心呢   哈哈 ~

咁 5 點半都走人喇   又係 Call 車番阿 mi 屋企 ~

沙灘無人了   

等車嘅時候有啲毛毛雨   之後又無 lu ~

咁我哋又傾偈啦   之後聽到後面架車 "砵" 咗好耐   我勁驚以為我哋車尾箱開咗   但又唔係   原來有條顛佬揸住架 7 人車喺咁片來片去   仲同另一架 7 人車鬥車   左 Cut 右 Cut 咁   最後就特登喺架 7 人車面前慢行   正賤人   之後見佢又飛向前面左穿右插咁   睇住佢喺兩架車中間片過   完全唔係行行車線   真係賤到無人有 ~           

  
番到阿 mi 屋企都係 6 點左右   阿 mi 阿喂就抹嘢   我同里奧大人就坐梳化睇電視   勁嘆   哈哈 ~

之後阿喂居然走去沖涼洗頭   大佬   咁樣我又好想沖涼洗頭㗎喇   不過我覺得佢應該仲係咁唔舒服   所以要沖涼醒醒神   我都有啲後悔今日 BBQ   因為我唔醒起佢之前咳   應該等佢多啲時間休息   好番哂先 BBQ 呢 ~

7 點唔夠又開局   今次玩大細先   又係每人做莊 20 舖   但今次我輸   哈哈 ~ 

 
玩到差唔多 9 點   阿喂有啲餓   咁阿 mi 就煮湯丸喇 ~

阿 mi 太飽所以無食   咁阿喂食 6 粒   我食 2 粒   里奧大人食 4 粒

阿 mi 見我成日眼濛   又比咗 2 排眼藥水比我   多謝多謝



食完就轉玩鋤大 D   我覺得玩鋤 D   輸得無大細咁多 ~   

今晚好唔在狀態呀   都唔知做咩鬼   人地出蛇   我就出 Pair   好驚囉 ~

又唔記比錢阿喂   呢下慘啲啦   好嘢唔會諗我嘛   實以為我呃佢錢啦   哈哈 ~

之後衰喂仲笑住串我   問我係咪覺得多牌就贏呀 ?!   笑到我同里奧大人肚痛呀   哈哈哈哈 ~

今晚堅邪   我話玩大細會輸好多   可以一舖賠清光   但玩鋤 D 就唔會輸咁多   3 炒最多陪 $12,000   唔會炒幾舖呀嘛 ?!   點知我玩大細已經輸咗 2 萬幾   玩鋤 D 就炒咗 3 舖   13 隻 12 隻同 10 隻咁炒   真係派錢派到手軟   慘 ~

咁阿 mi 去洗手間   阿喂話玩埋最後 5 手   咁無問題啦   佢都好攰   最衰我啦   揀今日 BBQ   唉 ~   

好喇   玩完即計數   我話今晚輸剩 $12,000   咁阿 mi 話都 OK 啦   輸萬幾   我話係輸剩萬幾啊   之後佢好驚訝話下   笑死我   聽漏一個字   意思差好遠呢   哈哈哈哈 ~

個個要數好耐   我就好快數哂   哈哈

 

阿 mi 今晚又比咗包魷魚同喉糖比我   真係又食又拎   多謝哂笠笠



話咁快就 10 點 45 分   咁 call 車番屋企喇   今晚我哋自己落樓搭車   因為阿喂頭先又沖咗涼   我唔想佢又落街咁   同埋我哋都要試下點行囉   但次次佢哋帶我哋走   都係掛住傾偈跟住行囉   衰奧仲特登指另一邊方向叫我行   我話佢呃人囉   行咗咁多次   我點都有啲印象嘅 ~         

番到屋企沖埋涼   都差唔多 12 點瞓呢 ~