臘潤腸炒菜心 + 叉燒炒飯 ( 27-MAR-2017 )

( 27-MAR-2017  MON )

嘩   今朝好好陽光呀   但尋晚瞓到半夜就熱醒啦   即刻扯番張珊瑚絨被出嚟   當堂無咁熱   哈哈 ~

早餐食芝腿治   之後再嘆報紙   爽 ~



菇場唔太忙   整埋個 Report 就可以抖 lu ~

Lunch Time 去一田買嘢   之後去 7 仔買嘢食   再買埋麵包比里奧大人   番到菇場已經 1 點 20 分   要急食呀   下次行超市都係買包食算喇   唔想咁趕 ~

清淨園有機粟米茶 ($28.9/盒) / 清淨園有機大麥茶 ($28.9/盒) - 好似幾唔錯咁   所以買黎試下

 
Napolina 薄餅皮 2 件裝 ($15) - 想焗 Pizza 好耐   但又唔係咁想買現成 Pizza   呢個只係薄底又好喎   得閒再買埋辣肉腸同芝士   咁就可以整 Pizza 喇

三祖小麥班戟粉 ($18.9) - 試咗覺得口感都煙韌   所以即買一包喇  

 


仍然 Hea 等放工   咁又同冰姑傾下偈   傾傾下又喊   唉   我估我真係仲未放得低   希望自己唔會有情緒病   哈哈 ~

放工就即番屋企   浸好菜就拖地   難得乾爽天氣   開埋機洗衫就等里奧大人放工喇 ~ 

今晚里奧大人成 7 點半先放工   好在唔餓咋   但就要快手囉   因為要炒嘢   哈哈 ~      

是日晚餐 - 臘潤腸炒菜心 + 叉燒炒飯 

臘潤腸炒菜心 - 唔想菜心咁悶嘛   咁淥熟啲菜   再煎香臘潤腸   加埋菜心一齊兜兩兜就搞掂 ~

叉燒炒飯 - 懶人首選   里奧大人又鍾意食   不過我覺得今次炒得好乾   好難吞咁呀   哈哈 ~

搞掂哂就即沖涼   里奧大人話我做咩成日洗拖鞋   我話炒完嘢嘛   驚有啲油彈咗落拖鞋   同埋果對係廚房拖   唔會着出廳呢 ~

今晚好攰呀   睇多陣電視   10 點半都瞓喇 ~