星林居雲南米線餐廳 @ 尖沙咀 ( 16-DEC-2017 )

火雞腎 + 豬腩肉小鍋米線 (小中辣) - 今次辣過中辣喎   辣到我呢

紫菜 + 豬腩肉小鍋米線 (小中辣) - 初初以為漏咗豬腩肉   我撈咗成 20 秒先撈到咋   仲要係濕濕碎碎咁   離譜囉   里奧大人仲慘   平時佢叫小辣   今次跟我叫小中辣   辣到佢食剩好多米線呀



( 16-DEC-2017  SAT )

今朝同家姐食早餐   一路食一路傾   啲時間過得勁快   眨下眼就話要番工 lu ~

菇場忙下停下   星期六真係無 Mood 做嘢   哈哈 ~

放工即走   好鬼凍呀 ~

番到屋企開機洗衫   差唔多 2 點半先去食嘢 ~

麥記啲餐   真係 Share 食都好夠飽   但無啦啦好想食甜嘢   所以叫個蘋果批   細個好怕食蘋果批架   覺得味道同口感都好怪   但大咗之後又覺得幾好味喎   



食完行陣   番屋企執下嘢   好快又 4 點半   今日好天   所以好想出去行下呀 ~

想出旺角   但又唔知有咩做   咁去尖沙咀啦   好似好耐無去過咁   同埋順便買香水   有啲嘢做下 ~

今日真係凍喎   我要帶冷帽同披肩呀   行行下好想食熱嘢   咁見到狗仔粉就入去啦   原來最低消費每人要 $20   我拉番里奧大人出來   哈哈   之後佢話一個人廿蚊有幾難呀 ?!   入去食啦 ~

狗仔粉 ($22) 





+3 豬油渣 - 都唔脆嘅   所以咬落成口油呀   同新加坡啲豬油渣差好遠喎

辣菜甫就勁辣   所以食完成身都會暖哂    



炸黑白丸 - 里奧大人最鍾意食   但其實係黑椒牛丸同唔記得咩丸   



雙併 (蘿蔔+豬皮) - 我一叫蘿蔔   里奧大人就話妳呢期好鍾意食蘿蔔   哈哈   真係喎   

   


好甜呀



其實一路食一路覺得好辣   所以真係要買番杯嘢飲   咁去買杯香芋珍珠啦   喺台灣飲珍珠奶茶飲品   真係食珍珠食飽   係由頭啜到尾都係珍珠㗎   香港真係啜兩啖就啜哂 lu ~

我未 Shake 嘅時候   我真係見唔到珍珠咁滯

珍珠唔煙韌嘅

食飽就要行啦   咁去 Canon 中心玩相機   真係大開眼界呀   我一定要玩嘅就係專業用嘅長鏡頭   因為真係唔會有機會接觸囉   咁貴又咁重   哈哈 ~

玩到差唔多 7 點就走喇   人地關舖呢 ~

無啦啦好想食酸辣米線   咁去星林居啦   但食埋今次   該唔會再嚟   因為啲餸嘅份量太少喇   同埋比我感覺係好求其   米線同啲配菜好似打風   賣相好似人哋食剩咁囉   張落單紙又喺隻碟度   濕濕立立好污糟咁   好老實講   見到唔係咁開胃 ~

食完去金英買 Issey Miyake (Florale)   已經加到 $325 喇   不過我都買咗 2 支   其中 1 支送比家姐呢 ~

買完搭巴士番屋企   感恩 5 分鐘就有車 ~

番到屋企即沖涼   之後睇戲   睇到 11 點都瞓着咗   哈哈 ~