打邊爐 @ MIMI 屋企 ( 23-DEC-2017 )

我發覺我地 4 個人嘅食量   真係越來越細   遲啲可能好簡單就得㗎喇   就咁煮一個雜菜煲就搞掂   哈哈哈哈

椰子蘿蔔湯底 - 阿 mi 本來話泡菜或者椰子湯底   我話我脷腫   所以佢話椰子湯底清熱

墨汁膠 + 明太子蝦膠釀油條 - 個名係睇番阿 mi 寫先知   哈哈   我只係記得阿 mi 話墨魚膠   我覺得好好味呀   整兩碟都一定食得哂   呵呵



淨番就淥來食啦    



香菜 / 冰菜 / 冰菜 - 個湯底好甜   所以我食咗好多菜   好味道呀   今次我話食豆卜   依家口味真係變哂        

 
炸魚皮 - 基本上打邊爐一定會有佢出現   主角來㗎



水魷 - 我話要食   其實想買 2 隻   不過里奧大人話 1 隻夠喎   嗚嗚

 
黃立鯧 + 脆肉鯇 - 條鯧魚好味呀   阿 mi 話係油甘味   同埋呢條只係 $18 咋   真係平靚正   好在佢地識揀魚呢      



美國豚肉 - 好味喎   但最後食剩兩塊要掉   之得我食埋去啦



( 23-DEC-2017  SAT )

今朝 9 點鬧鐘響   里奧大人話都醒架喇   都可以去飲茶   所以即喺群組講早晨   之後阿喂就打嚟 lu   咁約埋時間就即沖涼喇 ~

本來約 25 號一齊行   不過阿 mi 有節目   所以我都諗住兩個行   但阿 mi 之後話星期六會行山   問我有咩節目 ?!   我話我都 Off   但問問里奧大人想點   我先覆佢   咁里奧大人話下山好呀   咁就一齊行 lu ~

太耐無行山   所以一定要着護膝同行山鞋   着呢啲裝備真係要啲時間   所以搞到好趕 ~

約咗佢地 10 點 45 分   我又要買咖啡   差唔多 11 點先去到   又遲到  真係唔好意思   好在佢哋早出門去美心攞位咋 ~

咁我要去屈臣氏買啲嘢   所以我自己去酒樓   其實兜咗 2 次都唔見酒樓   我都去 Information Center 問人   唔想兜來兜去   去到酒樓   衰笠話妳咁叻識行嚟呀 ?!   我話梗係識   問人之嘛   哈哈哈哈 ~

阿 mi 話見我同里奧大人都好耐無飲茶   所以去飲茶   4 個人真係可以食多啲嘢   正呀 ~   

後生仔點心   熱氣嘢     



金絲酥芋角 - 好少酒樓有芋角㗎喇   所以一定要食呢 

沙律明蝦角 - 好味   因為好想食蝦   咩事呀呢期   成日想食蝦   超級怪囉   



五柳炸雲吞 - 由細到大都好鍾意食   最鍾意啲甜酸汁呢

蜜汁叉燒腸粉 - 呢個係大路嘅腸粉   但其實我唔鍾意食叉腸   唔知點解   哈哈   



阿婆點心   夠飽肚   哈哈哈哈 



臘味糯米包 - 又係好少酒樓有得食   對上一次係阿 mi 特登來九龍灣探我   我哋等咗好耐都唔見再有糯米包出車呀

欖仁馬拉糕 - 里奧大人必食   但真係好味   好記得阿 mi 話因為有豬油   所以咁香呢   



四寶滑雞扎 - 奧伯伯話食㗎   但又唔鍾意食嚿火腿扒同魚肚   阿喂見到嚿魚肚無人食   佢即話呢嚿好嘢嚟㗎   我叫阿喂食埋啦   奧伯伯唔食呢

香煎蘿蔔糕 - 我無食呀       



香滑蓮蓉包 - 原來阿喂鍾意食嘅   我仲以為係阿 mi 叫嘅麻蓉包添   



飲到 12 點幾就出發去城門喇   咁打的去嘛   啲衰的士又唔停喎   阿喂話可能太近喎   我咪話囉   近又嫌近   去機場又話嫌遠   我地因為唔想去的士站等   因為驚佢地排好耐   知道去城門咁近會黑面   所以先喺出面搵的士之嘛 ~

最後去番的士站啦   估唔到呢個司機咁好禮貌   里奧大人話佢講咗 4 次多謝添呀   呢啲咪有職業操守囉 ~

12 點 45 分開始行喇   今日無太陽   但仍無風囉   里奧大人話下路係無咩風呢   但我唔想上斜同行樓梯嘛   唯有要佢哋陪我行下路囉 ~

又係兩男兩女一路行一路傾   今次阿 mi 就講好多嘢喇   呵呵   咁都好   我無咩氣   哈哈 ~

行個幾鐘都要抖下   我堅攰呀   尋晚瞓得唔太好   起咗 2 次身   如果一覺瞓天光就應該夠精神   好好多呢 ~

仍然行行行   好鬼熱呀   但阿 mi 話啱啱好   好在里奧大人同阿喂都話熱咋   唔係真係以為得我一個熱添 ~

咁我帶咗朱古力脆餅嘛   阿 mi 成日話用嚟江湖救急   我買咗 2 盒   因為阿喂上次餓又無唔肯帶餅乾朱古力   咁佢唔帶就我帶啦   一話開咋   佢都話要食   即係餓啦 ~

阿 mi 去洗手間   我地就諗住順便坐低抖下   點知里奧大人一開完   已經有 2 隻馬騮喺佢後面喇   嚇死我哋   咁放番入袋即走啦   比馬騮搶咗背囊就慘了 ~

咁邊行邊食啦   最緊要唔好發出膠袋聲就可以 ~

今次阿喂失策喇   無拎個水樽   所以飲阿 mi 嘅熱茶啦   尾段我又要抖   咁又飲下水   阿喂又飲啦   但飲哂阿 mi 嘅   所以我比我嗰樽比佢飲啦   真係得一滴咁多   佢一滴都照飲呀   真係好慘咁   但其實里奧大人個樽仍然有啲茶   不過我唔想阿 mi 飲我哋口水尾   但其實我個水樽都有我口水   哈哈 ~

4 點終於行完   佢哋話比想像中快   其實我唔駛抖   係可以快 20-30 分鐘呢 ~

馬騮仔好得意





我覺得呢啲樹葉嘅顏色好特別   



4 點行完   坐小巴落荃灣    再去個商場買嘢飲   咁阿 mi 知道里奧大人鍾意食雪糕   所以帶佢佢買雪糕   之後佢地去 Toast Box 飲嘢   我哋買完再 Join 佢   其實坐落堅唔想郁 ~

阿 mi 飲熱咖啡   佢又叫我試一啖   佢次次一飲咖啡或新嘢   都會叫我試下㗎   好似家姐咁   哈哈 ~      

里奧大人又食兩球雪糕   我叫佢快啲食   因為阿 mi 等緊我哋   但佢以為阿 mi 係一路行一路飲呀   所以我哋之後都係一路食一路行去搵阿 mi 呢

1 杯凍蘆薈檸檬要 $25   咁阿喂又話食花生醬多士   所以我買呢個 Tea Set   都係 $38 咋   咁樣抵好多囉

食完就去街市買邊爐料   順便去買獨子蒜   我叫阿 mi 幫我揀   佢逐粒幫我揀   好有心機㗎   我都唔會咁   哈哈   所以真係好羨慕阿喂啦   入得佢口一定好嘢   唔靚唔好味嘅就一定佢老婆食哂嘅呢 ~

買完又去買魚買魚皮   最後買埋生果   再去買湯丸   因為阿喂知里奧大人鍾意食   最後一站係去 AEON 買埋椰汁   買齊哂嘢就番屋企 ~

阿喂要買啤酒   所以里奧大人陪佢   我同阿 mi 就番屋企先   佢係都要幫我拎嘢   我仲買咗 4 磅人參果添   其實同阿 mi 同家姐一齊   佢地一定唔會比我拎重嘢   講真   大家係女仔   佢哋話唔重啫   但我唔信囉   因為我都覺得重嘛 ~

我作頭痛呀   要食 Panadol   咁我坐喺梳化等阿 mi 比水我飲嘛   阿 mi 比杯水我嘅時候   就問我食咗未 ?!   我話水都未有點食呀 ?!   佢話含住落口度先嘛   大佬   藥來㗎   溶咗好苦㗎   要是我咁講   佢一定話: 怕乜鬼啫   又唔係叫妳咬碎 (總知我講乜鬼都會話   哈哈哈哈) ~

男人們無耐都番到來喇   咁我同阿 mi 都已經喺廚房整堅嘢 lu   我突然間好大聲話: 嘩   好大粒呀   嚇到阿 mi 問咩好大粒呀 ?!   我話粒獨子蒜呀   哈哈   佢梗係以為係強蛋啦   哈哈   喺廚房講好大粒係比較敏感  哈哈 ~    

之後我出來   見阿喂坐梳化   但唔見里奧大人   原來佢入房 Check 淘寶   阿喂就好似個小朋友咁   靜靜等爸爸做完嘢出來先玩   哈哈哈哈 ~

7 點唔夠預備晚餐   用咗 15 分開枱    7 點半就可以開餐喇 ~

其實頭先唔太餓   但一見到枱上食物   又當堂好鬼肚餓   呵呵 ~

我估我今日真係堅攰   居然隊個碗叫阿 mi 夾比我食   最搞笑係我同阿喂同一時間   真係邪   真係咩都咁似   哈哈 ~

食下傾下   啲時間過得好快呀 ~

都唔知幾點食完   咁洗完碗再傾過   又話食生果喇   原來都已經 10 點半   呵呵 ~

泰國柚子 ($28/個) - 真係好耐無食柚子   兒時回憶又番來喇  



食到飽一飽   望下個鐘都 11 點 10 分   係時候走人喇 ~

今晚又食又拎呀   阿喂比咗個薄荷油比我同家姐   阿 mi 又比咗條運動褲比我   又比朱古力比我同家姐   真係好有家姐心   成日咩都預埋家姐 ~

打的番屋企   拎番哂啲嘢出來就沖涼   之後又睇下 Youtube   12 點幾先瞓 ~