麻婆茄子杏鮑菇 + 煎紅腸 ( 5-DEC-2017 )

( 5-DEC-2017  TUE )

今朝出咗門口   行行下覺得好凍咁   原來唔記得着外套   所以即打道回府拎番件外套呀 ~

早餐食蛋牛治   飽得來無咁滯   但啲蛋就好老囉   如果唔係應該會更好味道 ~



菇場勁忙呀   最驚做長命 Report   要坐定定眼定定對住堆數字   真係做到個人好呆 ~

Lunch Time 出去買菜   之後再買埋燒賣同炒麵番菇場食 lu ~

1 點半即開工   做到 3 點幾再食埋碗綠豆沙   但其實一路食一路驚   因為好似好得閒咁   哈哈 ~



放工即走   番到屋企抖咗陣   居然瞓咗 10 分鐘添呀   好在 7 點起身   又精神好多喎 ~

7 點半開始預備煮嘢   蒸茄子同煮熟啲杏鮑菇   咁都要成 20 分鐘㗎 ~

家姐 8 點半嚟到   又一齊開餐   今晚煮丁麵比佢哋食   我就食餸算喇 ~

是日懶餐 - 麻婆茄子杏鮑菇 + 煎紅腸

麻婆茄子杏鮑菇 - 2 條茄子 + 3 隻杏鮑菇   加包麻婆豆腐醬同埋 4 隻尖椒   辣到呢   我一路煮一路咳   里奧大人又係咁   佢都習慣咗   家姐嚟就煮辣嘢   哈哈   不過家姐話依家食辣就會胃痛喇   所以我唔會再煮辣比佢 lu ~

煎紅腸 - 之前叫阿 mi 幫我喺青林買㗎   都有個幾兩個月了   其實我差啲唔記得佢存在   咁啱家姐嚟食飯   咁 3 個人好過 2 個人食啦   無咁飽   家姐最鍾意蘸茄汁喼汁   其實係我哋由細食到大嘅醬汁嚟呢   哈哈 ~

無啦啦又講細個啲嘢   以前爸爸成日叫家姐煮麵比佢食㗎   仲要加 2 條腸仔   好記得嗰時啲腸仔好好味道   又大條喎   唔係雞肉腸咁細條   但又無莊臣腸咁大條喎   所以我覺得佢嘅 Size 係最好呢 ~

我哋細個都有食消夜習慣   一家人用一大個玻璃杯沖煉奶   再浸克力架餅   個杯係好似足球咁一一格格嗰啲呢   我之前都買咗個細嘅   因為係一個回憶嘛   見到會好開心㗎 ~

等我洗埋碗又食生果   再睇下電視   家姐 10 點幾都走喇   我就即沖涼 lu ~

今日無乜點行   咁又唔係咁攰   所以熨咗 1 機衫同 3 套床單   郁下真係舒服好多  哈哈 ~

再睇多陣 Youtube 都已經 12 點   有睡意喇   即去瞓呢   呵呵 ~