2017年12月24日星期日

麥當勞 @ 荃灣 ( 24-DEC-2017 )




( 24-DEC-2017  SUN )

今朝 10 點起身   沖埋涼就番教會 lu ~

諗住去 Delifrance 食早餐   但經過 Toast Box 又好想飲佢杯咖啡   所以就喺度食早餐喇 ~

一個早餐要 $36   其實我真係覺得貴   不過依家茶記同快餐店都差唔多價錢   咁呢度就坐得舒服啲   不過選擇少囉   因為我唔想食三文治   哈哈     





尋日阿 mi 飲果杯咖啡   係好大杯架   點知原來早餐得咁細杯   不過其實我都夠飲   之後里奧大人 send 張相去谷   阿 mi 即問有無 +$3 轉大杯   哈哈哈哈   我唔知有得轉大杯架        



因為要幫晴晴買電腦   所以我叫里奧大人直接打比佢問啦   一陣買唔啱就煩 ~

咁講完買咩啦   里奧大人就問佢做嘢做成點呀 ?!?!   點知一講公司嘢   晴晴就喊得好犀利呀   其實我地都知佢做嘢唔係咁開心   不過唔知點開口問   佢地成日叫我唔好提話要番香港   搞到我好大壓力   即係講咩都要諗清楚先好講   唔好講啲嘢令到佢好想番香港   即係講咖哩魚蛋都係罪架   因為呢樣食物係充滿香港特色咁呢 ~

我咪話囉   番來香港抖下   搵朋友傾下偈   總好過依家自己屈住屈住啦   講到我火都黎   情緒唔好   妳以為一句兩句就可以舒緩到佢嗎 ?!?!?!   痴線 ~

晴晴係咁喊   咁我話比我同佢傾啦   佢點解唔開心   有咩壓力   佢通通同我講哂出來   我直接問佢係咪唔開心 ?!   佢停咗幾秒無答   咁即係唔開心啦   我話有咩唔開心要講出來   等舅父舅母幫妳盡量諗辦法   但就唔會同妳 Daddy 媽咪講嘅   佢先肯講話唔開心咋 ~

佢唔開心都無同 Daddy 媽咪講   話講黎無用   我完全明啦   因為佢地覺得啱嘅   就一世都係啱嘅   無腦的 ~

咁我唔知仲傾幾耐嘛   所以我叫里奧大人去剪髮   唔好嘥時間嘛 ~

傾完望下手機   原來都已經 12 點 10 分   咁去搵里奧大人喇   經過商場就買咗啲養生糖   但買完好想喊囉   咁鬼貴   $110 得 7 粒咋   心都痛埋   我叫里奧大人食嘅時候要慢慢 dap 呀 ~

之後家姐 whatsapp 買咗 After Eight 朱古力比我   真係好在我頭先無時間買咋   唔係就有排食啦   不過都知家姐點都會買   上次我喺百佳話買黎 share 食   但都係覺得價真棧抵 d   所以我話等我買囉 ~

去德福 Broadway 睇完再出高登格價   但相差只係 $500   都係去 Broadway 買好啲 ~

咁搭地鐵去荃灣 Aeon 睇咩價錢啦   反正今晚要去媚姨教會 ~

去到荃灣都 2 點 40分   咁去食酸辣米線啦 ~

豬扒+芽菜酸辣米線 (中小辣) - 豬扒超級好味   但今次湯底唔酸唔辣呀   有啲失望



午餐肉+紫菜+魚腐酸辣米線 (小辣) - 里奧大人話估唔到佢食我哂   我話佢勁大食囉   哈哈



咁食完米線   阿喂問我地喺邊 ?!   之後就約埋一齊去天仁食雪糕   咁我地唔食嘛   里奧大人就自己去 Citystore 格價   我地就 3 個坐低傾偈   差唔多食完   里奧大人都番黎喇   之後一齊行到天橋就分手喇 ~

經過三生堂   買咗玫瑰花茶同胎菊   之後先去 Aeon ~

好在食完先行去 Aeon   因為好似行極都未到咁   嘩哈哈哈哈   無咗阿 mi 帶路   堅唔想再行荃灣   覺得有啲迷失   雖然阿 mi 教咗我地   但行錯方向   最終都係開 Google Map   同埋問人   哈哈 ~

其實搭地鐵嘅時候   里奧大人話去 Aeon   仲問我喺邊 ?!   我好快咁話唔知喎   次次都跟阿 mi 行嘛 ~      

今次勁喇   幾乎行哂荃灣所有商場    哈哈哈哈   仲經過荃錦中心同愉景新城   大佬   究竟我地喺邊呀 ?!?!?!   最後真係要問商場嘅保安員點行囉   真係毫無頭緒嘛   哈哈 ~ 

4 點半   企喺天橋望到有揀商場   勁開心   以為搵到   但望真啲原來係荃新天地   好似都係去過架   等接阿表去酒店 ~

唉   再去到唔知邊個商場   又好熟面口喎   因為同阿 mi 飲過茶   里奧大人話上多層係 Aeon   咁又覺有喎   最終又係去 Information Centre 問人   原來係對面先係荃灣廣場 ~

經過超市   真係好鬼多人   根本咁多人係唔會有 mood 睇嘢 ~

終於去到電器部   得 2 款 Samsung model 咋   行咁耐得個桔   笑死我 ~

但真係好攰嘛   我話去扮試梳化啦   可以坐下   之後里奧大人話梗係試按摩椅啦   嘩哈哈哈   咁都比佢諗到 ~       

講就天下無敵   最後都係行去 MX 食個 tea 算喇   其實已經 5 點 20 分   呢啲時間兩頭唔到岸   如果唔係勁攰   真係會繼續周圍行囉 ~

抖咗陣   里奧大人問我一個好恐怖嘅問題   就係問我點行去媚姨間教會 ?!   之後佢再 check 啦   話要行 15 分鐘   真係聽到個行字都驚   哈哈 ~

我頭先經過食店   話想食燒賣   估唔到里奧大人記得   但其實我好飽   不過點都要食啦 @@

  
呢日真係行咗幾個大大大運喇   所以對腳同腰都好攰呀 ~

咁原來行番去新之城係好近咋喎   好記得阿 mi 都話好近   但我地因為行錯方向   所以行咗好多冤枉路囉   嗚嗚嗚嗚 ~ 

6 點到新之城   再去三生堂買嘢   買完都 6 點半   咁去麥記食 d 嘢啦   真係唔餓都要食   唔係要 10 點先食嘢呢 ~

食完行去教會   好在阿 mi 教咗我地點去教會   又教埋我地邊度搭巴士番屋企   咁我地唔駛搵   哈哈 ~

約咗媚姨同佢朋友 7 點 15 分喺教會門口等   7 點半開始   9 點左右完畢   不過我同里奧大人講   以後唔會再黎呢間教會   因為比我感覺唔舒服 ~

家姐揸車黎拎嘢呀   佢成日好驚擺哂 d 嘢喺我屋企   咁我尋晚買咗盒湯丸同人參果同獨子蒜比佢   咁啱之前又買咗潤唇膏   所以一次比埋佢   咁佢又比埋 After Eight 同 2 人電飯煲比我   交換完禮物都走人喇 ~

我之前同姑奶話想買潤唇膏   咁佢話幫我買   但我又唔想去特登出去拎   話買完話我知啦   我去拎   咁之後家姐又話呢隻好用   我即再問姑奶可唔可以幫我買 (因為我以為佢唔記得嘛)   點知佢話已經幫我訂咗   等佢朋友同佢交收   呢下我真係好感動   佢真係會記住我講嘅嘢   



After Eight 朱古力   係由細食到大架   所有薄荷口味嘅朱古力同糖   我都好鍾意食   薄荷朱古力雪糕都好鍾意食架



呢幾粒糖要 $110   越彤越心痛   嘩哈哈哈哈 



黑杞子 ($60) / 金邊玫瑰 ($25) / 胎菊 ($30)



薄荷葉 ($20) / 黑桑椹 ($40) 



新鮮都好味架   但乾貨就方便啲



沖埋涼   睇多陣電視   成 1 點先瞓呀 ~

沒有留言:

發佈留言