部隊鍋 + 芒果小丸子 ( 15-APR-2018 )

材料係 1 碗泡菜 + 4 條腸仔 + 1 罐細午餐肉 + 8 條年糕 + 2 個辛辣麵   最終食唔哂啲腸仔  留番聽日食啦咁   下次再整   每樣材料減半先得咯

( 15-APR-2018  SUN )

里奧大人尋晚話今朝番早堂崇拜   但今朝 9 點幾又同我講話今日唔番崇拜   因為好多嘢做   咁我哋繼續瞓   一瞓瞓到  11 點 40 分   即梳洗去食早餐喇 ~

食完就去超市買嘢   里奧大人就做公司嘢 ~

番到屋企就沖涼   之後熨 2 機衫   順便又執下嘢 ~

無啦啦好攰呀   3 點半瞓到 4 點 15 分呀   之後飲碗湯又抖下   唔知做乜鬼   感覺到個人好腫   條頸同腳瓜 "long" 又痛喎   嘆埋今晚   聽晚我又要開始徑步   成日覺得自己郁得好少咁 ~

無食 Lunch   咁今晚早啲食   我 6 點開始煮嘢喇 ~

是日晚餐 - 部隊鍋 + 芒果小丸子  

部隊鍋 - 家姐之前比咗包過期泡菜比我   過咗幾日無問題啦   最緊要無臭嘛   哈哈   咁一於整個山寨版部隊鍋啦   因為有啲材料係無落到   我唔想特登又買茄汁豆 金菇 洋蔥 豚肉 豆腐囉   里奧大人話唔好話山寨版   鍾意食咪得囉   好感激佢非常感激我成日煮飯   哈哈   其實本來就咁成鍋整熱   但里奧大人鍾意食煎咗嘅午餐肉腸仔   咁煎啦   最開心個砂鍋出籠喇   買咗起碼 7 年   今次大派用場了   哈哈哈哈 ~

芒果小丸子 - 里奧大人呢排工作壓力好大   成日話想食甜嘢 Relax 下   咁我就整呢個甜品喇   估唔到易整又好味   特別係啲小丸子   煙煙韌韌   里奧大人仲以為我買番嚟   我話我搓㗎   佢覺得好驚訝   哈哈 ~

洗埋嘢就開機洗衫   之後沖涼喇 ~

睇睇下電視好驚囉   個胃好似黎料咁   其實一食年糕同小丸子   里奧大人都話因住胃痛呀下    我話無問題   我會咬到好碎   好在抖陣又無嘢喎   呵呵 ~

今日瞓咗晏覺   今晚無睡意呀   之後里奧大人無啦啦問我係咪胃痛瞓唔到 ?!   好奇怪會咁問喎 ~

終於差唔多 1 點都要瞓啦   聽日要番工嘛   仲要係星期一呢 ~