2018年4月8日星期日

燻蹄 (外賣) + 腐乳通菜 ( 8-APR-2018 ) + ( 9-APR-2018 )






( 8-APR-2018  SUN )

今朝 8 點起身番早堂   里奧大人話咁樣啲時間會好用啲 ~

崇拜完畢就食早餐   之後買埋燻蹄就番屋企喇   都只係 11 點幾   時間真係好好用呢 ~








里奧大人番到屋企即瞓覺   我睇多陣電視都瞓埋覺添呀   其實尋晚夜瞓   今朝起身都攰   哈哈 ~

瞓到差唔多 1 點   之後就做下家務咁啦   里奧大人就要做公司嘢 ~

3 點半去食下午茶   食完即番屋企   里奧大人好多嘢要做呀   慘 ~




咁我話想食炒飯   里奧大人話好   但佢食咗一碗仔   之後我食哂   我嬲嬲哋咁話下次佢食咁少嘅話   咁唔好叫啦   我咁食法好辛苦   之後佢話見我想食喎   但真係唔想食就要講啦   上次又係咁   話明 Share 食變咗我一個食   我食唔到咁多家嘛



我就熨 3 機衫   熨完條腰勁攰呀   同埋好似作緊每月一咁   個肚有啲扯住 ~

雖然唔餓   不過 7 點半都開飯喇   我就只係食啲餸囉   但就煮個上海麵比里奧大人食 ~

是日懶餐 - 燻蹄 (外賣) + 腐乳通菜  

燻蹄 (外賣) - 想食好耐   不過唔想特登行去買囉   今日就腳   所以就買喇   但價錢貴咗份量又少咗囉   等我下次自己整下先   其實整唔難   最緊要唔好係成隻豬手咁樣就得架喇   哈哈 ~   

腐乳通菜 - 好耐無食通菜   又買黎食下啦 ~

搞掂哂即沖涼   再開機洗衫 ~

個肚扯住痛   所以 10 點幾都自己瞓先喇 ~


( 9-APR-2018  MON )

尋晚個肚扯住痛   半夜肚醒添呀   原來真係每月一到呀   咁都好   扯咗無耐就到   哈哈 ~

打番菇場請病假   之後瞓到 10 點半就睇醫生 ~

感恩個肚唔痛   但個人好攰   同埋成日嘔   問咗醫生   話賀爾蒙問題喎 ~

瞓呀瞓   瞓到 4 點幾   個肚開始痛   所以繼續瞓 ~

里奧大人 9 點放工   叫佢食埋嘢先番屋企喇   我完全無胃口 ~

佢番到屋企嘅時候   我就起身沖涼   今日雖然痛又成日嘔   但無上次咁辛苦   感恩感恩 ~

沒有留言:

發佈留言