2018年4月27日星期五

韓式餃子蟹柳上海麵 + 蠔油白菜仔 ( 17-APR-2018 )

對焦錯哂添 @@





( 17-APR-2018  TUE )

尋晚瞓得好好呀   一覺瞓天光 ~

但唔知係尋晚食咗條朱古力雪條   定係前一晚瞓得唔好   先咁好瞓呢 ?!?!?!

早餐食奶醬多   無啦啦好想食甜嘢 ~



菇場其實超級忙   但因為今日所有大粒唔喺度   所以我決定做自己嘢   爽爆呀   哈 ~

Lunch time 出去買麵包比里奧大人   之後再買牛筋丸米番菇場食呢 ~



仍然 hea 過   超級爽爆   同埋放工即走   唔駛又特登坐多陣   嘻嘻 ~

去街市買菜之後再行陣超市   之後再睇埋中醫就番屋企 lu ~

今次最主要調理身體   呢年成日頭暈暈唔對路嘛   加上我有肌瘤   所以我唔會再做手術架喇   無理由次次翻發都做   身體真係頂唔順   我 2014 年再做全麻手術   健康程度真係不大如前   個人易攰又無記性   咁當然年紀又大   呢 d 衰嘢真係少不免了   哈哈 ~

醫師話我寒濕同埋貧血   我問佢點解睇得出 ?! (勁呢   遲早比人小   哈哈)   咁佢話睇我隻手掌係黃色喎   但其實我覺得自己咀唇白雪雪更似喎 ~

咁唔緊要啦   都係食 7 日藥粉    如果身體有 d 好嘅話   我都會繼續試下 ~~~~

番到屋企都 7 點喇   快快手整埋個隔夜嘅炒飯   咁加埋 d 泡菜啦   連食 3 餐泡菜同腸仔   好驚囉   嗚嗚 ~

好多時炒飯都痴底   因為我落好少油   所以如果得 1 碗冷飯   我絕對唔會炒   炒埋得 1/3 碗   嘩哈哈哈   今晚都有碗半飯   咁要炒啦   同埋試過一次翻蒸炒飯   好鬼難食架 



冰姑話呢幾日成日都見到泡菜   我話因為過咗期   想快 d 清埋去   阿 mi 就話有我最愛嘅腸仔   聽佢地 d 語氣   真係好替我開心咁喎   但我真係食到好驚啦   救命 @@



食完抖陣洗埋嘢   差唔多 8 點就去徑步   又徑半個鐘   番到屋企都即沖涼   再開機洗衫 ~

里奧大人 9 點幾放工   咁要打的番黎喇   佢咁夜放工   我又要煮嘢佢食   又要洗碗   真係好似由朝做到晚咁   不過佢咁辛苦   又真係唔忍心叫佢出去食囉   佢又鍾意食快餐   成日話最緊要快   我話都唔爭在啦   食 d 健康 d 仲好啦 ~~~~

是日懶餐 - 韓式餃子蟹柳上海麵 + 蠔油白菜仔

韓式餃子蟹柳上海麵 - 加 2 條蟹柳同泡菜   感覺似新嘢   我驚里奧大人話泡菜辣   問佢鍾唔鍾意食泡菜   估唔到佢即刻答話鍾意食泡菜   不過鍾意食都唔會成日整   醃制嘢無益呢 ~

蠔油白菜仔 - 買咗半斤   只淥咗 4 棵比里奧大人食   我真係好飽食唔落呀 ~

咁里奧大人瞓 11 點自己瞓先嘛   之後問我做咩成日咁夜瞓   我話差唔多啦   佢以為我話 "得唔得丫"   心諗做咩咁串答佢   哈哈 ~

今晚我都差唔多 12 點先瞓   唔知做咩鬼唔係咁眼瞓囉   慘 ~

沒有留言:

發佈留言