韭菜水餃 + 老黃瓜乾螺頭豬骨湯 ( 28-APR-2018 )

里奧大人蘸餃子汁再加泰國辣椒粉   估唔到勁好味







( 28-APR-2018  SAT )

今朝好快搞掂   所以有好多時間食早餐呢 ~



菇場忙   但唔想做住呀   想整旅行啲相 ~

放工即走   去埋街市買豬肉就番屋企 lu ~

2 點半去食下午茶   今日係媽咪死忌   所以我食食下喺度喊   嚇死里奧大人   因為明明講緊笑   佢成日話我情緒波動好大   咁我都承認   同埋我依家失去咗嘅係媽咪喎   點可能無傷痛喎 ~

同里奧大人講話等我開門先   佢話開咩嘢門 ?!   我話奶醬多好似對門咁   哈哈 



唉   洗煲跌爛咗個蓋   咁拿拿聲拎住個煲蓋去配啦   個 Staff 好好人幫我度 Size   但都係驚有出入   話拎個煲落黎好啲   咁我番屋企再拎個煲啦   原來要買 20cm   初初諗住買 22cm 咋   好在聽個 Staff 話咋   感恩感恩 ~

5 點左右諗住榨西瓜汁   之前仲剩咗一半嘅西瓜   所以我放入冰格雪凍   咁我拎出嚟諗住切碎   但係劈都劈唔開   之後問里奧大人點算好 ?!   佢話解凍先嘛   咁樣根本劈唔開   哈哈 ~

解凍完都即榨汁   但點搞都唔會變汁   正想掉咗去   再望一望咁似西瓜沙冰嘅 ?!   所以我同里奧大人講   如果大家都肚屙   應該係杯沙冰問題   哈哈 ~



6 點左右飲湯   去濕利尿一定要早飲   唔係夜晚成日去廁所 ~

今晚就咁淥餃子   實在太方便喇   哈哈 ~

包咗 4x隻   今晚食一半就夠了   



用濃湯寶做湯底   再加啲芹菜粒



是日晚餐 - 韭菜水餃 + 老黃瓜乾螺頭豬骨湯  

韭菜水餃 - 材料係 1 斤韭菜 + 水餃皮 ($6) + 水展 ($20) + 免治豬肉 ($20)   賣韭菜阿姐話 1 斤韭菜加廿蚊瘦肉就最好   咁我記住啦   但我買咗廿蚊水展   覺得份量唔夠喎   先醒起廿蚊水展同廿蚊瘦肉嘅分別   我應該係記住豬肉單位唔係價錢呢   人生第一次包哂啲水餃皮   簡直係所有嘅材料份量係啱啱好   我仲已經上網搵家食剩水餃皮嘅食譜添呀   依家唔駛用 lu   但衰在啲餡好 "鞋"   我已經落咗麻油囉   下次真係要落番啲油會好啲 ~   

老黃瓜乾螺頭豬骨湯 - 係時候又去濕   其實想清哂啲乾螺頭同埋眉豆扁豆   不過應該仲要煲多 3 次先清得哂 ~

洗埋碗都 9 點半   同里奧大人去徑步   其實我好攰   但見佢太耐無徑步   咁陪下佢啦   反正今晚徑步實有汗出   因為好鬼熱呀   哈哈 ~

徑大半個鐘就番屋企   即開機洗衫   之後沖涼喇 ~

等里奧大人沖完涼   就 "北" 杯雪糕比佢食   等佢 Relax 下 ~

睇多陣電視   12 點都瞓覺 lu ~