喇沙 + 黑椒台灣腸 ( 16-MAY-2018 )

( 16-MAY-2018  WED )

今朝里奧大人上大陸   佢出門口之後   我都即瞓番 lu ~

之前成日話未食五月糉   寒衣未入櫳   但今星期開始   應該係無可能著長袖啦   哈哈 ~

早餐食吞拿魚治烘底   開始有啲厭喇 ~

菇場忙到九彩   最怕啲嘢改嚟改去   要用好多時間搵家嘛 ~

越忙越亂   今日我都頂自己唔順   問完 8 卦又話無嘢   無嘢之後又問番佢   但其實我睇到嘅嘢係無問題嘅   之後佢都話 : 你係咪以為我好得閒同妳玩呀 ?!   笑鬼死我 ~

終於 Lunch Time   去完銀行入票就買飯   勁想食飯呀 ~

阿齋見我食飯都覺得好奇怪   佢之前聽我話想食飯都覺得驚訝   以為聽錯 ~

食完飯個人又好似有啲力氣咁噃   真係無咁攰   但個胃又好似頂住頂住咁   不過唔理喇   再試多次先   如果頂唔順就唔食 lu ~

忙到呢   做到 5 點 45 分先放工   本來想做多陣   但我呢邊熄咗冷氣   好鬼焗   所以要走喇 ~

呢兩晚食咗榴槤   驚里奧大人熱氣   所以去超市買涼粉比佢   順便買埋洗衣液   以前喺藥房買洗衣液架   但發覺好似越黎越無味咁   我已經只係洗大半機衫   落嘅係一機份量   正路無理由無味囉   之後再同阿 mi 講開   佢都話係咁   所以我依家喺超市買補充裝   仲要特價嘅時候先買   咁樣好過喺藥房買囉 ~   

番到屋企就熨 2 機衫   再等里奧大人電話   如果太遲番到屋企就各自食 lu ~

里奧大人打黎話 8 點半右番到屋企   咁我話喺屋企食啦   我煮麵   唔駛又特登出去 ~   

是日懶餐 - 喇沙 + 黑椒台灣腸  

喇沙 - 清埋最後呢兩包   仲要係未過期就清哂就最開心呢   呵呵   不過我唔會落包奶粉   咁樣反而好味道   好在之前冰姑教路   如果唔係我永遠唔會食呢隻喇沙呢 ~

黑椒台灣腸 - 上次食剩 3 條   今晚食埋佢喇   開焗爐焗就最方便   因為我唔想又清潔爐頭呀   我一洗又要洗兩個喎   但其實無油彈到嘅   但硬係覺得洗咗會乾淨啲咁囉 ~      

洗埋碗都 9 點幾   即沖涼再開機洗衫 ~

搞掂哂就做功課   不過做咗少少唔做喇   好鬼難呢 ~

今晚都幾攰   11 點幾都瞓喇   最搞笑里奧大人無啦啦問我   尋晚做咩咁夜瞓 ?!   我話你又知我夜瞓 ?!   佢話 12 點幾摸下隔離   但無人   所以好驚喎   都唔知驚乜   哈哈 ~