2018年5月6日星期日

梅菜蒸肉餅 + 菜心 + 酸甜齋 (外賣) ( 6-MAY-2018 )









( 6-MAY-2018  SUN )

我同里奧大人半夜去咗 2 次廁所   可能食咗生果呀   但食嘅時候又無諗到添   呵呵 ~

不過我又唔係好眼瞓喎   感恩呢 ~

沖埋涼就出發食早餐   今日要事奉   所以要早 d 番教會預備呢 ~

見到半塊炸豬扒   我問侍應係咪得半塊 ?!   佢話係   但其實妳不如切一半先炸囉   比人感覺妳無切起半塊嘛   個蕃茄通粉仲衰   橙色嘅   以前食係紅色好正常架   同埋好多蕃茄粒   最慘係個湯係越食越杰   好恐怖   食到一半已經變咗一 pat 嘢咁   勁難食囉 ~





崇拜完畢就去 Taste 買餸   里奧大人就去姑奶屋企整嘢 ~

我番到屋企都 2 點   開機洗衫就抖下 ~

里奧大人差唔多 3 點   所以家姐就黎車我去舖頭   我又可以比埋 d 手信比佢   咁順便接埋里奧大人番屋企 ~

家姐話佢同事話好好味喎   所以托阿 mi 買 2 筒 



又係托阿 mi 買架   比麥包用架   獸醫診所要 $80/支 (仲要係折咗)   布吉買 115B/支咋



我同阿 mi 都好奇怪   點解家姐會知喺泰國有得買 ?!?!   因為我同阿 mi 都睇咗係點用先   之後最尾先睇到有串泰文字   今次家姐都要感恩啦   咁啱阿 mi 去泰國可以幫到佢買   33



番到屋企就蒸點心食   里奧大人食完就瞓陣   我就抹嘢 ~

公仔點心 d 點心   真係唔會再買第 2 次   真係唔知自己食緊 d 咩咁   哈哈  



佢醒咗就做公司嘢啦   之後話食完飯就同我染髮   佢知道我上上星期已經話想染嘛   佢都好記得我講嘅嘢嘅   所以唔衰嘅時候   做埋 d 嘢確實令人感動   不過   我都無以前咁感動 lu   呵呵 ~

叫阿 mi 幫我買嘅零食   樣樣買齊   勁感動呀   來生再報恩   嘩哈哈哈哈 



Goody 呢個牌字嘅芒果乾好味呀



我鍾意食呢 d 魚仔同橙色脆卜卜   上次喺清邁忍手唔買   但今次忍唔到   因為阿 mi 都買過來食   我信佢咋 



見阿 mi 成日買酸菜   我又話要買  



一路影相   我覺得自己好似啱啱去完泰國番來咁呀   哈哈   呢盒橙味 ENO 都抵架   但阿 mi 話其實比之前貴咗 50B 呀



阿 mi 送比我嘅手信   33
Goody 榴槤乾   諗起成個清邁都無得買就激鬼氣 



我話買架喎   但阿 mi 又話係手信送比我   多謝哂   33  



阿 mi 話呢隻魚鬆好味道   又益我啦   





阿 mi 話豬媽媽品牌嘅食物好味道   係都要每樣比一包我   我又欠佢好多啦   哈哈哈哈



抖到 6 點就煮飯喇   早 d 食早 d 休息 ~   

是日懶餐 - 梅菜蒸肉餅 + 菜心 + 酸甜齋 (外賣)

梅菜蒸肉餅 - 我次次問里奧大人想點整 d 餸   佢都會話最緊要方便   呢樣嘢就真係最好   不過仍都知道   我太難都唔識得整啦   哈哈   我叫佢揀梅菜肉餅定鹹魚蒸肉飯 ?!   佢揀梅菜   今次我醒喇   記得落油   但都係鞋鞋地喎   慘 @@

菜心 - 將 d 梅菜頭切碎   鹹鹹地好過落豉油啦   哈 ~

酸甜齋 (外賣) - 里奧大人見到就問喺邊度買 ?!   佢次次見到甜酸齋都問邊度買    好搞笑 ~

洗埋碗就染髮   咁我都幫佢染埋   之後佢話我長頭髮好難搞   我話我 d 頭髮邊算長呀 ?!?!?!

20 分鐘後先可以沖頭沖涼   又可以抖下 ~

好耐無見自己 d 頭髮咁黑   但望落去又幾精神咁   哈 ~

好鬼攰呀   今晚 11 點 15 分都自己瞓先喇 ~~~~

沒有留言:

發佈留言