蜜糖烤金沙骨 + 蒜蓉蒸節瓜 + 自家制麵包 ( 9-AUG-2020 )

( 9-AUG-2020  SUN )

今朝里奧大人出咗門口   我就瞓得麻麻哋   因為成日係想瞓與唔想瞓之間咁   不過估唔到一瞓又瞓到 9 點   咁起身喇 ~

梳洗之後就食早餐   抖陣就去街市買嘢喇 ~

Panash 買咗 1 條丹麥酥   比咗一半家姐    3 塊比里奧大人   我就食埋呢 3 塊   咁樣分配都唔錯

去完街市買餸   諗住去惠康買罐頭   但真係拎唔到喇   哈哈 ~

番屋企放低所有嘢   再去超市買汽水同咖啡   拎到半路有啲想嘔嘅感覺   唔知係咪辛苦得滯   哈哈 ~

去咗街市一轉 我買咗半斤銀針粉 + 半斤油麵 + 1 包夜香花 + 1 包祛濕料 + 1 斤半南瓜 + 2 條台灣茄子 + 2 斤灰冬瓜 + 3 個紅肉火龍果 + 3 條脆肉瓜 + 3 包金菇 + 8 隻雞膇 總共 18 磅 怪不得拎到我死死下啦 ~

執好哂所有嘢   之後即煲石斛同冬瓜祛濕茶   搞掂哂就大清潔完廁所就即沖涼喇 ~

里奧大人 2 點幾放工   咁叫佢買下午茶番屋企一齊食 ~

食完就抖陣   今朝用得太多力   唔想郁呀 ~

家姐無啦啦 Whatsapp 話我尋日用咗好多錢   我話唔係喎   都係五百蚊左右   我問佢做咩咁講 ?!?!  佢話我尋日買嘢全部係我比錢   但我話麥記同 Starbucks 都唔係我比呢 ~

以前我未嫁仲搞笑   同家姐食飯   佢直頭比埋張八達通比我搭車番屋企㗎   一係就比散紙我搭車   好似好驚我無錢咁 ~

里奧大人就瞓晏覺   我就睇 Youtube   之後 5 點瞓到 5 點半   勁精神 ~

6 點幾預備晚餐   7 點幾就可以開餐喇 ~

是日晚餐 - 蜜糖烤金沙骨 + 蒜蓉蒸節瓜 + 自家制麵包

蜜糖烤金沙骨 - 之前買咗急凍金沙骨   係時候要整下喇   今次整得勁好味呀   所以食得好開心   哈哈 ~

蒜蓉蒸節瓜 - 呢排番工無乜食辣嘢   所以有時夜晚都會想食啲辣嘢   咁就加隻指天椒啦 ~

自家制麵包 - 里奧大人同事比㗎   原來係蒜蓉包   好味呀 ~

洗埋碗再大清潔廚房   之後沖涼喇 ~

里奧大人熨衫   我話留比我聽晚熨啦   佢又話唔駛 ~

睇多陣電視   今晚大家 11 點都瞓喇 ~