美國穀飼安格斯牛仔骨 + 紅油青瓜 & 麻油海蜇青瓜 + 粟米蛋花湯 ( 29-SEP-2021 )

( 29-SEP-2021  WED )

尋晚發好多夢   有好有唔好   所以瞓得唔係咁好   唉 ~

鬧鐘響咗   諗緊徑唔徑步好 ?!  懶床 2 分鐘之後都係醒咗   咁去徑步啦 ~

早餐食腿蛋包   依家開始唔知食咩好添 ~

菇場唔忙呀   所以執 File 櫃   好想郁下   呢排個人真係比較攰   希望快啲正常番啦   哈哈 ~

Lunch Time 出去行   差啲以為星期一   仲想去一田買嘢添 ~

咁喺附近行個大圈   買埋鯪魚球米就番菇場喇 ~

4 點幾又開始忙   但放工前肯定搞掂   嘻嘻 ~

放工即走   里奧大人今日放假   所以我都會即刻煮飯呢   不過今晚 6 點 45 分先食得 ~

是日晚餐 - 美國穀飼安格斯牛仔骨 + 麻油海蜇青瓜 & 紅油青瓜 + 粟米蛋花湯

美國穀飼安格斯牛仔骨 - 家姐喺 Aeon 買比我㗎   話好食咁佢一定再買   話唔好食佢一定唔開心   哈哈   不過肉質真係好嘅   里奧大人話唔駛大力扯喎   因為我次次煮牛仔骨都好 "鞋"   佢話食牛肉出街食啦   我心諗以為佢驚我煮得辛苦   點知佢下一句話: 唔駛咬到牙都軟   笑死我呀   正衰人   哈哈哈哈 ~

麻油海蜇青瓜 & 紅油青瓜 - 里奧大人唔食辣   所以開包即食麻油海蜇比佢   我就食紅油青瓜   里奧大人話咁分開兩碟最好   因為成日話佢唔食菜   我話樣樣分兩份要洗多幾隻碟呀   麻鬼煩就真啦 ~

粟米蛋花湯 - 我覺得唔夠蔬菜   所以開罐粟米湯呀 ~ 

洗埋碗再清潔廚房   今晚比較攰   所以唔去徑步喇 ~

食埋生果   差唔多 9 點半先睇劇   不過我睇到 10 點半都瞓覺 lu ~